स्पाउज क्लब अफ आरसी चितवनले महिला सशक्तीकरण, सामाजिक एकता र हिन्दू संस्कृतिको संरक्षण गर्ने उद्देश्यले श्रावण मेहन्दी कार्यक्रम सम्पन्न गरेको छ।
क्लब अध्यक्ष जानकी तिवारी शर्माको अध्यक्षतामा आयोजित कार्यक्रममा सचिव बबिता घिमिरेले श्रावण महिनाको धार्मिक, सांस्कृतिक तथा सामाजिक महत्वबारे प्रकाश पार्दै यस्ता कार्यक्रमले नेपाली महिलाबीच एकता, सद्भाव र सहकार्यको भावना अभिवृद्धि गर्न सहयोग पुग्ने बताइन्।
कार्यक्रममा अध्यक्ष शर्माले रोटरीको महिला सशक्तीकरण तथा सामाजिक उत्तरदायित्वलाई प्रभावकारी रूपमा अघि बढाउन क्लब प्रतिबद्ध रहेको उल्लेख गर्दै यस्ता कार्यक्रमले महिलाबीच आत्मीयता, नेतृत्व विकास र सामाजिक सहभागिता बढाउन महत्वपूर्ण भूमिका खेल्ने बताएकी थिइन् ।
उनका अनुसार क्लबले आगामी वर्षभरि महिला तथा बालबालिकालाई लक्षित विभिन्न सामाजिक कार्यक्रम सञ्चालन गर्ने योजना बनाएको छ। वार्षिक कार्ययोजनाअन्तर्गत निःशुल्क स्वास्थ्य शिविर, रोजगारमूलक तालिम, शैक्षिक सामग्री वितरण, वृद्धाश्रममा तीजको दर कार्यक्रम, बालबालिकाका लागि पोषण कार्यक्रम तथा किशोरी र महिलाका लागि महिनावारी स्वास्थ्य सचेतना (Menstrual Hygiene Awareness Campaign) सञ्चालन गर्ने छ। यी कार्यक्रमहरू रोटरी क्लब अफ चितवनसँगको सहकार्यमा सञ्चालन हुने जनाइएको छ।
कार्यक्रमको अन्त्यमा सहभागी महिलाहरूले मेहन्दी लगाउँदै श्रावण पर्वको उल्लास मनाएका थिए। सो अवसरमा सामाजिक सेवाका कार्यमा एकताबद्ध भएर सक्रिय रहने प्रतिबद्धता पनि व्यक्त गरिएको थियो।
कार्यक्रममा क्लबका पूर्वअध्यक्ष, बोर्डका पदाधिकारी तथा सदस्यहरूको उल्लेखनीय उपस्थिति रहेको थियो।
