राष्ट्रिय स्वतन्त्र पार्टीकी सांसद सुमना श्रेष्ठले संसदमा महिला नेतृलाई चेली भनेर सम्बोधन नगर्न अनुरोध गर्नुभएको छ । शनिबार प्रतिनिधि सभाको बैठकमा सम्बोधन गर्दै श्रेष्ठले यस्तो बताउनुभएको हो ।
उहाँले महिला नेतृलाई चेली भन्ने भए पुरुष नेतालाई के चेला भन्ने हो भन्दै प्रश्न गर्नुभयो । उहाँले पुरुषहरुलाई चेला भनेर सम्बोधन गरेको आफूले नसुनेको भन्दै महिलाहरुलाई पनि चेली नभन्न आग्रह गर्नुभयो ।
उहाँले भन्नुभयाे, ‘यो सदनमा धेरै चोटी सुनियो चेली । महिला नेतृहरुलाई चेली भनेपछि पुरुषहरुलाई के चेला भन्छौं ?’
यस्तै उहाँले महिलाप्रति आत्मीयता नै देखाउनु छ भने ५० प्रतिशत महिलालाई संसदमा पठाउन पनि आग्रह गर्नुभयाे । उहाँले भन्नुभयाे, ‘यदि आत्मीयता नै छ भने ३३ प्रतिशत न्यूनतम हो ५० प्रतिशत महिला यो सदनमा पठाइयोस् ।’
