पाकिस्तानको दक्षिणी बन्दरगाह सहर कराँचीको एक आवासीय भवनमा भएको शक्तिशाली ग्यास विस्फोटमा परी मृत्यु हुनेको सङ्ख्या १६ पुगेको छ। तीन तले भवनको पहिलो तल्लामा अचानक भएको विस्फोटले सिङ्गो भवन आंशिक रूपमा भत्किएको छ।
सहायक प्रहरी उपरीक्षक जमशेद आशेरका अनुसार विस्फोट यति शक्तिशाली थियो कि यसले भवनको संरचनामा ठूलो क्षति पुर्याएको छ। घटना लगत्तै उद्धारका लागि राज्यको स्वामित्वमा रहेको ‘रेस्क्यु ११२२’ को टोली परिचालन गरिएको छ।
विपद् प्रतिक्रिया सवारी साधन र सहरी खोजी तथा उद्धार विज्ञहरूको टोलीले भग्नावशेषमा पुरिएकाहरूको खोजी कार्य जारी राखेको छ। उक्त भवनमा साना र साँघुरा कोठाहरू रहेकाले सीमित ठाउँका कारण उद्धार कार्य निकै चुनौतीपूर्ण बनेको उद्धार टोलीले जनाएको छ। मेसिनरी र जनशक्ति परिचालन गरेर भग्नावशेष हटाउने प्रयास भइरहेको छ।
प्रहरीले घटनाको विस्तृत अनुसन्धान सुरु गरिसकेको छ। पहिलो तल्लामा ग्यास चुहिएर विस्फोट भएको प्रारम्भिक अनुमान गरिए पनि प्राविधिक टोलीले यसबारे थप अध्ययन गरिरहेको छ।
भग्नावशेषमुनि अझै केही मानिस पुरिएको आशङ्कामा उद्धार टोलीले सतर्कतापूर्वक काम गरिरहेको छ। न्युज एजेन्सी नेपाल
