नारायणी नदीमा ‘सिग्नेचर पुल’ निर्माणको काम सुरु भएको छ । पूर्व–पश्चिम राजमार्गको चितवनको भरतपुर र नवलपुरको गैडाकोट जोड्ने नारायणी नदीमा ‘सिग्नेचर पुल’ निर्माणको काम सुरु भएको हो । निर्माणको ठेक्का पाएको तुँदी निर्माण कम्पनीले दुई सातादेखि फिल्डको काम सुरु गरेको जनाएको छ ।
‘अहिले नारायणी नदीमा पुल निर्माण गर्न नारायणगढ तर्फ पाइलिङको तयारी भइरहेको छ,’ प्रोजेक्ट म्यानेजर इन्जिनियर मञ्जिल मिश्रले भने ‘बर्खा अगाडि नै डेकुरेशनको काम सक्ने योजनाका साथ काम अगाडि बढाएका छौँ ।’ एक अर्ब ६८ करोडमा ठेक्का पाएको निर्माण कम्पनीले ३६ महिनाभित्र सक्नेगरी काम अगाडि बढाएको छ । प्राकृतिक प्रकोप नआए बर्खा अगाडि नै नारायणी नदीको दुई वटा पिलरको डेकुरेशनको काम सकिने मिश्रले जानकारी दिए ।
यस सिग्नेचर पुलमा नदीको भागमा दुई र दायाँ–बायाँ दुईगरी चार वटा पिलर हुनेछन् । नारायणगढ तर्फ एक महिना भित्र पाइलिङ सकेर गैँडाकोट तर्फ अर्को महिनादेखि पाईलिङको काम सुरु गरिने उनले जानकारी दिए । मिश्रका अनुसार यस वर्ष केही फाउण्डेशन र सव स्टक्चरको काम सुरु गरिनेछ ।
‘बर्खा अगाडि पिलर उठाउँदैनौँ । अर्को वर्षदेखि पिलर उठाएर काम गछौँ,’ उनले भने ‘प्राकृतिक प्रकोप भएन भने यस वर्ष फाउण्डेशनको २५ देखि ३० प्रतिशत काम गर्छौँ।’ सडक विभागले पुल निर्माणका लागि सन् २०२३ मा ठेक्का लगाएको थियो । एक वर्ष डिजाइन र अप्रुबलको समय राखेको थियो । हामीले डिजाइन सकेर कामको अख्तियारी पाएको २५ दिन मात्र भयो, उनले भने ‘अब जतिसक्दो छिटो सक्ने गरी काम अगाडि बढाउँछौँ ।’
यहाँ अत्याधुनिक प्रविधियुक्त दुई लेनको पुल निर्माण हुने छ । अब बन्ने पुलको आयु कम्तीमा एक सय वर्ष हुने छ । २०३८ सालमा निर्माण भएको अहिलेको पुलको आयु ७० वर्ष तोकिएको छ । २०३८ सालअघि नारायणी नदीमा फेरीको सहायताले यातायातका साधन वारपार गराइन्थ्यो । अहिलेको नारायणी पुल जिर्ण बन्दै गएको छ ।
नारायणी नदीमा अहिले भएको पुलको समानान्तर हुने गरी (जोडेर) ४२० मिटर लामो ‘सिग्नेचर पुल’ निर्माण गरिने छ । यसको ११ मिटर चौडाइ हुनेछ । सिग्नेचर पुल अन्तर्गत आर्चब्रिज, केबल नेटवर्किङ आर्च, सस्पेन्सन लगायतका संरचना पर्छन् ।
सो पुलमा साइकल लेन समेत निर्माण हुनेछ । नयाँ पुलमा दुई ठाउँमा टावर राखिनेछ यो पुलमुनिबाट पानी जहाज सञ्चालन गर्न सकिने बताइएको छ । अब महेन्द्र राजमार्ग पनि फराकिलो हुने र त्यसपछि पुल पनि फराकिलो चाहिने हिसाबले नयाँ पुल बनाउन लागिएको हो । पुलको शिलान्याश तत्कालिन प्रधानमन्त्री प्रधानमन्त्री पुष्पकमल दाहालले वि.स २०८१ बैशाख ३१ गते गरेका थिए ।
