नेकपा एमालेका महासचिव शंकर पोखरेलले पार्टीनिकट पत्रकारहरूलाई सहमतिबाटै नेतृत्व चयन गर्न निर्देशन दिएका छन् ।
विराटनगरमा आइतबार सुरू प्रेस चौतारी नेपालको महाधिवेशन उद्घाटन समारोहलाई सम्बोधनका क्रममा उनले यस्तो निर्देशन दिएका हुन् ।
‘महाधिवेशन आजका दिनमा जुन परिस्थितिमा हुँदै छ, अहिले हामीलाई एकता चाहिएको छ’, उनले भने, ‘हामीलाई प्रतिस्पर्धा होइन, सहमति चाहिएको छ । अहिले कांग्रेस र एमाले मिलिरहेका छन् । यो अवस्थामा सर्वसम्मत र एकताबद्ध रूपमा नेतृत्व निर्वाचित गर्नु होला ।’
उनले संगठनलाई छरितो र गतिशील संगठन चाहिने बताउँदै प्रेस चौतारी नेपालको आकार सानो र चुस्त हुनुपर्ने बताए ।
‘हामीलाई एकताबद्ध संगठन चाहिएको छ । सबैलाई एकताबद्ध गर्न जरुरी छ’, उनले भने, ‘हिजोको विभाजनको पीडा सम्झिऊँ । चुनाव होइन सहमति गरौँ । तपाईँहरूको संगठन तपाईँले बनाउने हो । एकताबद्ध र छरितो बनाउनुस् ।’
