निजी क्षेत्रको दूरसञ्चार सेवा प्रदायक एनसेलले सन् २०२५ भित्रै नेपालबाट थ्रिजी सेवा बन्द गर्ने भएको छ।
नेपाल आर्थिक पत्रकार समाज (सेजन)ले बुधबार काठमाडौँमा आयोजना गरेको ‘रिभाइटलाइजिङ द टेलिकम इन्डस्ट्री’ विषयक कार्यक्रममा एनसेलका प्रमुख कार्यकारी अधिकृत तथा प्रबन्धनिर्देशक जाब्बोर कायुमोभले उक्त जानकारी दिएका हुन्।
यही वर्ष थ्रिजी सेवा बन्द गर्ने तयारी कम्पनीले गरेको उनको भनाइ थियो। यसका लागि सरकारले भीओएलटीई प्रविधि नचल्ने फोनको आयातमा कडाइ गर्न उनले सरकारलाई अनुरोध गरे।
अब नेपालको टेलिकम व्यापार सब्स्क्रिप्सन मोडलमा लैजान ढिलो गर्न नहुने उनको भनाइ थियो।
कार्यक्रममा कायुमोभले नियामक नेपाल दूरसञ्चार प्राधिकरणको भूमिका सेवा प्रदायकहरुलाई सहजीकरणमा बढी केन्द्रित हुनुपर्नेमा राजस्व संकलनमा बढी ध्यान दिएकोमा चिन्ता व्यक्त गरे।
