विनास्वीकृत जापान गएको भन्दै विरोधपछि कोशीका आन्तरिक मामिला तथा कानुन मन्त्री लिलाबल्लभ अधिकारीले राजीनामा दिएका छन्।
प्रदेश मन्त्री परिषद् र संघ सरकारको अनुमती बेगर जापान गएको विषय विवाद हुँदा मन्त्री अधिकारीले आज (बुधबार) पदबाट राजीनामा दिएका हुन्। उनले बुधबार बिहान मुख्यमन्त्री हिक्मत कार्कीलाइ राजीनामा बुझाएको कार्कीका प्रेस सल्लाहकार विक्रम लुइँटेलले जानकारी दिए।
मन्त्रीहरूले विदेश भ्रमणमा जाँदा प्रधानमन्त्री तथा मन्त्रिपरिषद्को कार्यालयमार्फत परराष्ट्र मन्त्रालयको सहमति लिनुपर्ने र विदेश भ्रमणको सहमतिका लागि परराष्ट्र मन्त्रालयमा लेखिपठाउँदा प्रदेश मन्त्रिपरिषद्को निर्णय सहित पठाउनुपर्ने व्यवस्था छ । तर मन्त्री अधिकारी मन्त्रीपरिषद्को निर्णयविपरीत जापान पुगेका थिए। उनले पारिवारिक भेटघाटका लागि जानुपर्ने भएपछि समय नपाएको बताउँदै आएका छन।
