राष्ट्रिय स्वतन्त्र पार्टीले सभापति रवि लामिछानेलाई पक्राउ गर्न आएका प्रहरीलाई प्रतिवाद नगर्न निर्देशन दिएको छ। लामिछानेलाई पक्राउ गर्न प्रहरी टोली पार्टी कार्यालय पुगेपछि कार्यकर्तालाई यस्तो निर्देशन दिएको प्रवक्ता मनिष झाले बताए।
‘पक्राउ गर्न आउनुभएका प्रहरी अधिकारीहरूलाई कुनै किसिमको प्रतिकार र अवरोध नगर्न पार्टी सदस्यहरूलाई अनुरोध गरिएको छ’ उनले भने। प्रवक्ता झाले लामिछानेविरुद्ध सरकारले प्रतिशोध साँधेको भन्दै सत्तापक्षले कसैको राजनीति अवसर जोगाउन कुण्ठित कदम चालेको आरोप पनि लगाए।
‘राष्ट्रिय स्वतन्त्र पार्टीको सभापतिलाई पक्राउ गर्न नेपाल प्रहरी पार्टी कार्यालय बनस्थली, काठमाडौं पुगेको कुरा सत्य हो’ उनले भने, ‘यो सत्तापक्षले कसैको राजनीति अवसर जोगाउन कुण्ठित कदम चालेको हो र राजनीतिक प्रतिशोध साधेको कुरामा हामी स्पष्ट छौँ।’
