नेपाल सुपर लिग २०२३ अन्तर्गत दशरथ रंगशालामा आज साँझ (शुक्रबार) चितवन एफसीले पहिलो पटक वीरगञ्ज युनाइटेडको सामना गर्दैछ । साँझ साढे ५ बजे सुरु हुने यस खेलसँग जोडिएका तथ्यांकः
१. चितवन र वीरगञ्जबीच यसपल्टको प्रतियोगिताको नवौं खेल हुँदैछ । यो समग्रमा प्रतियोगिताको ३४ औं खेल हुनेछ ।
२. वीरगञ्ज प्रतियोगिताको नवप्रवेशी टिम हो । त्यसैले चितवनले पहिलो पटक वीरगञ्जको सामना गर्दैछ ।
३. दुवै टिम प्रतियोगितामा पहिलो जितको प्रयासमा हुनेछन् । चितवनले यसपल्ट दुई खेल खेलिसकेको छ । त्यसमा एक हार र एक बराबरी रहेको छ । पोखरा थन्डर्सको हातबाट १–० ले पराजित भएपछि चितवनले काठमाडौं रेजर्ससँग १–१ को बराबरी खेलेको थियो ।
४.वीरगञ्जले एकै खेल खेलेको छ र उसलाई धनगढी एफसीले २–१ ले हराएको थियो ।
५. लिग अंक तालिकामा चितवन एक अंकमा छैटौं स्थानमा छ । वीरगञ्ज भने शून्य अंकमा आठौं स्थानमा छ ।
६. प्रतियोगिताको पहिलो संस्करण खेल्नेमध्ये चितवन नै एक मात्र त्यस्तो टिम रहेको छ, जसले कुनै जित निकाल्न सकेको छैन ।
७. चितवनले समग्रमा आठ खेल खेलेकोमा तीन बराबरी खेलेको छ भने बाँकी पाँच खेलमा हार बेहोरेको छ ।
