कालिका
पदमपुरमा ‘तेस्रो जितिया कप थारु ब्याडमिन्टन प्रतियोगिता’ हुने
चितवन, असोज १६–
थारु महिलाहरुको महान् चाड जितिया पर्वको अवसरमा तेस्रो संस्करणको जिल्ला स्तरीय ‘जितिया कप थारु ब्याडमिन्टन प्रतियोगिता–२०८०’ हुने भएको छ । थारु युथ स्पोर्टस् चितवनको आयोजनामा हुन लागेको प्रतियोगिता यही असोज १९ र २० गते कालिका नगरपालिका–३, पदमपुरस्थित कवर्ड हलमा हुनेछ ।
प्रतियोगितामा २ वटा क्याटेगोरीमा खेल हुने छ । थारु युवाहरुलाई लक्षित ‘थारु ओपेन चितवन’ र ‘बी’ श्रेणीका सबै खेलाडी खेल्न पाउने ‘बी ओपेन चितवन’ अन्तरगतका खेल हुने प्रतियोगिताका संयोजक दिपेन्द्र कुमार चौधरीले जानकारी दिए । उनका अनुसार प्रतियोगितामा चितवन जिल्ला ब्याडमिन्टन संघद्धारा जारी गरिएका ‘ए’ लेभलका खेलाडीले प्रतियोगितामा भाग लिन पाउने छैनन् ।
प्रतियोगितामा भाग लिन दर्ता शुल्क २ हजार रुपैयाँ तोकिएको छ । जसका लागि बुधबार सम्ममा खेलाडीहरुले नाम दर्ता गराउनुपर्ने छ । थारु युवाहरुलाई खेलकुदमा सक्रिय बनाउनुको साथै स्वस्थ जीवनका लागि ‘खेल खेलौं स्वस्थ रहौं’ भन्ने नाराका साथ प्रतियोगिता आयोजना गरिएको प्रतियोगिताका सदस्य सचिव शरद चौधरी (एस.के)ले जानकारी दिए ।
प्रतियोगितालाई भव्य रुपमा सफल बनाउन आर्थिक स्रोतको खोजी भइरहेको आर्थिक समितिका संयोजक शिवनारायण चौधरीले बताए । उनले थारु ओपेनतर्फ प्रतियोगितामा प्रथम हुनेले नगद ३० हजार, द्धितीय हुनेले १५ हजार र तृतीय हुनेले ७ हजार रुपैयाँ पुरस्कार पाउने छन् । यस्तै बी ओपेनतर्फ पनि प्रथम, द्धितीय र तृतीय हुनेले समान ३०, १५ र ७ हजार रुपैयाँ पुरस्कार पाउने चौधरीले बताए ।
प्रतियोगिताको तयारी अन्तिम चरणमा पुगेको प्रतियोगिताका प्रचारप्रसार समितिका संयोजक दिपेन्द्र चोधरीले जानकारी दिए ।