चितवनको माडी नगरपालिका १ चितईमा बिजुलीको तार सर्ट भई आगलागी हुँदा साढे ३ लाख रुपैयाँ बराबरको क्षति भएको छ । सोही ठाउँका राजकुमार विकको घरछेउमा रहेको फर्निचरमा सोमबार बिहान साढे पाँच बजेतिर आगलागी भएको चितवन जिल्ला प्रहरी कार्यालयका प्रवक्ता डीएसपी विजयराज पण्डितले जानकारी दिए ।
आगलागीमा परी दुईवटा बाख्रा जलेर मरेका छन् । आगो राजकुमारको भान्साकोठा र बाख्रा गोठसम्म फैलिएको थियो । कुनै मानवीय क्षति नभए पनि आगलागीमा परी साढे तीन लाख रूपैयाँ बराबरको नोक्सानी भएको डीएसपी पण्डितले बताए ।
