तथ्यांक कार्यालय चितवनले बिहीबार सार्वजनिक गरेको राष्ट्रिय जनगणनाको नतिजाअनुसार जिल्लाको जनसंख्या सात लाख १९ हजार ८५९ रहेको छ । त्यसमध्ये पुरुष तीन लाख ५१ हजार ७८९ (४८.८६ प्रतिशत) र महिला तीन लाख ६८ हजार ६७ (५१.१४ प्रतिशत) जना छन् । यहाँ एक लाख ७९ हजार ३४५ परिवार छन् ।
जिल्ला स्तरिय नतिजा सार्वजनिक गर्दै तथ्यांक कार्यालय चितवनका प्रमुख यज्ञमुर्ती भण्डारीले ६९.७० प्रतिशत महिलाको आफ्नो नाममा घरजग्गा नभएको बताए । नतिजाअनुसार घरजग्गा दुवै आफ्नो नाममा भएका महिला १५.९९ प्रतिशत छन् । जग्गा मात्र भएका ११.२९ प्रतिशत, घरमात्र भएका १.९४ प्रतिशत र उल्लेख नभएका १.०७ प्रतिशत महिला छन् ।
जिल्लामा १.४७ प्रतिशत परिवारले शौचालयको प्रयोग नै गर्दैनन् । सबैभन्दा धेरै ६९.५५ प्रतिशत परिवारले फ्लस भएको (सेफ्टिक ट्यांक) शौचालय प्रयोग गर्ने गरेका छन् भने २६.३५ प्रतिशत परिवारले साधारण शौचालय प्रयोग गर्छन् । ०.५३ प्रतिशत परिवारले सार्वजनिक शौचालय र २.१० प्रतिशत परिवारले फ्लस भएको (सार्वजनिक ढल) शौचालय प्रयोग गरेको पाइएको छ ।
