नेकपा माओवादी केन्द्रको पोलिटव्युरो सदस्य सूर्य सुवेदी ‘पथिक’को घरमा पार्किङ गरी राखेको स्कुटरमा अचानक आगलागी भएको छ । भरतपुर महानगरपालिका–१५ विष्णु चोकस्थित पथिकको घरको कम्पाउण्ड भित्र पार्किङ गरिराखेको ना ३५ प ७४४९ नम्बरको स्कुटरमा शनिबार राति साढे १० बजे अचानक आगो लागेको चितवन प्रहरीले जानकारी दिएको छ ।
ईप्रका फुलवारीबाट प्रहरी बरिष्ठ नायव निरीक्षक ज्ञान बहादुर पाण्डेको कमाण्डमा खटिएको टोलीले आगो नियन्त्रणमा लिएको हो । आगो के कसरी लाग्यो भन्ने कुरा अहिलेसम्म नखुलेको चितवन प्रहरीका प्रवक्ता विजयराज पण्डितले जानकारी दिए ।
माओवादी केन्द्र जिल्ला समन्वय समिति चितवनले आइतबार प्रेस विज्ञप्ति जारी गरी दोषी उपर कारबाहीको माग गरेको छ । स्कुटरमा भएको आगजनीबाट घरको अगाडिको भागमा समेत क्षति पुगेको माओवादी केन्द्र चितवनका संयोजक रामचन्द्र अधिकारीद्वारा जारी विज्ञप्तिमा उल्लेख छ ।
