नेपाली कांग्रेसको १४ औं महाधिवेशन अन्तरगत आज (सोमबार) पूर्वी चितवनको कालिका नगरपालिकामा अधिवेशन सम्पन्न भएको छ ।
कालिकामा रहेका १० वटा वडामा सर्वसम्मत रुपमा नयाँ कार्यसमिति चयन गरिएको छ भने एउटामा मतदान मार्फत नेतृत्व टुंगो लागेको निर्वाचन समितिले जनाएको छ । सर्वसम्मत नेतृत्व चयनका लागि निकै समय लागेको थियो । वडा नं.३ मा राति ९ बजे मात्रै सर्वसम्मत नेतृत्व टुंगो लागेको मतदान अधिकृत ठाकुरप्रसाद लामिछानेले नारायणी अनलाइनलाई जानकारी दिए ।
यस्तै वडा नं.४ मा मतदान मार्फत नेतृत्व चयन गरिएको छ । मतदान मार्फत वडा सभापतिमा कोमल श्रेष्ठ विजयी भएका छन् । उनले निकटम प्रतिद्धन्द्धी विवेक दाहाललाई हराउँदै सभापतिमा विजयी भएका हुन् । निर्वाचित श्रेष्ठले ४२ मत प्राप्त गरे भने दाहालले १८ मत मात्रै प्राप्त गरेको मतदान अधिकृत दिननाथ ढकालले नारायणी अनलाइनलाई जानकारी दिए ।
सर्वसम्मत गर्ने प्रयास विफल भएपछि मतदान मार्फत नेतृत्व चयन गरिएको हो । यस्तै अन्य सबै वडामा पनि निकै रस्साकस्सीकाबीच सर्वसम्मत नेतृत्व टुंगो लागेको हो ।
