चितवनको नारायणी नदीमा प्रतिबन्धित तियारी जाल प्रयोग गरी अवैध रुपमा माछा मार्ने २४ जना पक्राउ परेका छन् ।
आज (सोमबार) विहान ३ बजेको समयमा भरतपुर महानगरपालिका–२६ स्थित नारायणी नदीमा माछा मार्दै गरेको अवस्थामा चितवन राष्ट्रिय निकुञ्जले उनीहरुलाई पक्राउ गरेको हो । उनीहरुको साथबाट २ क्वीन्टल माछा र ४४ थान तियारी जाल बरामद गरिएको निकुञ्ज प्रमुख संरक्षण अधिकृत अणनाथ बरालले जानकारी दिए ।
निकुञ्जले माछा ओसारपसार गर्ने एउटा बोलेरो जीप र २ वटा स्कुटर समेत बरामद गरेको छ । पक्राउ परेकाहरुलाई राष्ट्रिय निकुञ्ज तथा वन्यजन्तु संरक्षण ऐन २०२९ बमोजिम मुद्धा दर्ता गरी कानुनी कारबाही गरिने बरालले जानकारी दिए ।
निकुञ्जसंग जोडिएका नदीहरुमा माछा मार्न प्रतिबन्ध लगाईएको छ । ती नदीहरुमा माछा मार्नका लागि बाटे समुदायहरुलाई सिमित मात्रमा लाइसेन्स दिएको छ ।
