चितवन, कात्तिक २२ –

चितवनकी वाग्मती प्रदेश सांसद गिता वाग्लेले आफूले पाएको दसैँ भत्तामा एक महिनाको मासिक पारिश्रमिक थप गरी एक जना विद्यार्थीलाई प्राविधिक विषय पढाउनु भएको छ ।

सांसद वाग्लेले गोरखा घर भई नारायणगढमा बसोबास गर्ने हर्षिता ढकाललाई चितवन मेडिकल कलेजमा रेडियोग्राफ्री विषय अध्ययनका लागि भर्ना गरिदिनु भएको हो । वाग्ले आँफै कलेज पुगेर ढकालको भर्ना बापत एक लाख भुक्तान गरिदिनु भएको हो । पार्टीले दसैँ भत्ता फिर्ता गर्न निर्देशन दिएको भए पनि आँफुले तलब समेत थप गरी एक जना छात्रालाई प्राविधिक शिक्षा पढाउन लागेको वाग्लेले बताउनुभयो । आगामी वर्ष पनि ती विद्यार्थीको शिक्षण शुल्कमा सहयोग गर्ने उहाँको भनाइ छ ।
प्राविधिक शिक्षा तथा व्यवसायिक तालिम परिषद् (सीटीईभीटी)को तीन वर्षे कार्यक्रम रेडियोग्राफीमा ढकाललाई उहाँले भर्ना गरिदिनु भएको हो । समाजसेवी वाग्लेले गत वर्ष मनहरीमा ओम शान्तिले निर्माण गरेको आमा घरमा दुई महिनाको तलब प्रदान गर्नु भएको थियो । उहाँले रामपुरमा निर्माण हुँदै गरेको गौंतम बुद्ध अन्तर्राष्ट्रिय क्रिकेट रंगशालालाई एक लाख प्रदान गर्नु भएको छ । वाग्लेले विभिन्न संघसंस्थालाई सहयोग गर्दै आउनु भएको छ । उहाँ नेपाली कांग्रेसबाट प्रदेश सांसद बन्नुभएको हो ।