गैरआवासीय नेपाली संघको नयाँ नेतृत्वका लागि अहिले निर्वाचन सुरु भएको छ ।
साँझ ७ बजेदेखि निर्वाचन सुरु गर्ने कार्यतालिका रहे पनि असन्तुष्ट समूहको होहल्लाको कारण ढिलो गरी निर्वाचन सुरु भएको । नयाँ नेतृत्वका लागि ४२ पदका लागि ७६ ले उम्मेदवारी दर्ता भएको संघका प्रमुख निर्वाचन आयुक्त शिव रिजालले जानकारी दिए । विद्युतीय मेसिनबाट हुने निर्वाचनमा मतदान भएको एक घण्टामा नै मतपरिणाम सार्वजनिक गर्ने उनले बताए ।
मङ्गलबार साँझदेखि बुधबार अपराह्न ३ः०० बजेसम्म उम्मेद्वारी दर्ताको समय तोकिएको थियो । नयाँ नेतृत्वमा अध्यक्षमा कुमार पन्त र कूल आचार्यले उम्मेदवारी दर्ता गराएका छन् । यसैगरी महासचिवमा जानकी गुरुङ र डा हेमराज शर्माले उम्मेदवारी दर्ता गराएका छन् ।
निर्वाचनमा करीब दुई हजार ४०० मतदाता सहभागी हुनेछन् । उनका अनुसार संघको नयाँ नेतृत्व दुई वर्षका लागि निर्वाचित हुने गर्दछ ।
‘म, मेरो एनआरएन र मेरो नेपाल’ भन्ने मूल नाराका साथ मङ्गलबारदेखि शुरु भएको संघको नवौँ नेपाली विश्वसम्मेलन तथा अन्तर्राष्ट्रिय महाधिवेशनको उद्घाटन राष्ट्रपति विद्यादेवी भण्डारीले गरेकी थिइन् । बिहीबारसम्म तीन दिनसम्म चल्ने सम्मेलनमा ८१ मुलुकका करीब दुई हजार ५०० प्रतिनिधि सहभागी छन् । सम्मेलनको बिहीबार प्रधानमन्त्री केपी शर्मा ओलीले समापन गर्नेछन् ।
