‘राष्ट्रका लागि हप्ताको दुई घण्टा स्वयंसेवा’ भन्ने नाराका साथ सुरु भएको वाग्मती सफाइ महाअभियानको आज ६९८ औँ हप्तामा तिलगङ्गा पारीपट्टी पहँेलो पुल क्षेत्रमा सफाइ गरिएको छ ।
भारी वर्षाको समयमा पनि अभियानकर्मीहरूको सक्रिय सहभागिताका साथ आज तिलगङ्गा पारिपट्टि पहेँलो पुलमा वाग्मती किनार कालोपत्र सडकतर्फका झारपात, घाँसलगायत कुहिने फोहरलाई जमिनमुनि खाडल खनेर गाडिएको छ । यसरी गाडिएको फोहरले नदी किनारमा रोपिएको बिरुवालाई मलको काम गर्ने अभियानकर्मी किशोरसिंह शाहीले राससलाई जानकारी दिनुभयो ।
यसैगरी, काँचका फुटेका सिसा, बोतल, प्रयोग भएका सुई, कार्पेट गरी करिब एक मेट्रिकटन नकुहिने फोहर काठमाडौँ महानगरपालिका वातावरण विभाग टेकुको समन्वयमा व्यवस्थापन गरिएको उहाँले जानकारी दिनुभयो । अर्को हप्ताको सरसफाइ कार्यक्रम सिनामङ्गलस्थित वाग्मती पुल क्षेत्रमा गरिने महाअभियानले जनाएको छ ।
विसं २०७० जेठ ५ गतेदेखि सुरु भएको वाग्मती सफाइ महाअभियान सुरु भएको हो । सुरु भएदेखि प्रत्येक हप्ताको शनिबार बिहान दुई घण्टा वाग्मती सफाइ महाअभियान जारी छ । वर्षा, जाडो, चाडपर्व, भूकम्प, कोरोना, बन्दाबन्दीलगायत प्रतिकूल अवस्थामा पनि सफाइ महाअभियान नरोकिएको अभियानकर्मी डा माला खरेलले जानकारी दिनुभयो ।
महाअभियानबाट प्रेरणा पाएर काठमाडौँ उपत्यकामा वाग्मतीका सबै सहायक नदीमा सफाइ अभियान सुरु भएको छ । यसैगरी चक्रपथका विभिन्न खण्डमा पनि सफाइ अभियान सुरु भएको छ । यसैगरी काठमाडौँ उपत्यका बाहिरका मुख्य सहर, नदी र सम्पदास्थलमा पनि सफाइ अभियान सुरु भएको छ । वाग्मती सफाइ महाअभियानबाट प्रभावित भएर हाल देशभर १११ भन्दा बढी स्थानमा सफाइ अभियान सञ्चालन भइरहेका छन् । रासस
