मानवताको सेवालाई केन्द्रमा राख्दै नवलपुरको प्रसिद्ध धार्मिक स्थल मौलाकालिका मन्दिर परिसरमा बृहत् रक्तदान कार्यक्रम आयोजना गरिएको छ।
विश्व रक्तदाता संगठन नवलपुरको आयोजनामा भदौ २७ गते भोलि (शनिबार) बिहान ७ बजे मौलाकालिका मन्दिर परिसरमा रक्तदान कार्यक्रम सञ्चालन हुन लागेको हो । विश्व रक्तदाता संगठन नवलपुरका संयोजक सन्तोष वाग्लेले कार्यक्रमको सम्पूर्ण तयारी पूरा भएको जानकारी दिए । उनले विहानैदेखि रक्तदाताहरुलाई उपस्थित हुन आह्वान गरे ।
विश्व रक्तदाता संगठन नेपालका संस्थापक अर्जुन अधिकारीले रक्तदाताहरुको सहजताका लागि मौलाकाली केवलकारमा आवातजावत निःशुल्क टिकटको व्यवस्था गरिएको जानकारी दिए । उनले सबै रक्तदाताहरुलाई विहानै कार्यक्रममा उपस्थित भइदिन आग्रह गरे ।
यस कार्यक्रम धार्मिक सेवा समिति मौलाकालिका मन्दिर, मौलाकालिका केबलकार, वे ग्रुप र लायन्स क्लब अफ गैँडाकोटको सहकार्यमा गरिएको हो। कार्यक्रमको प्राविधिक सहयोग नेपाल रेडक्रस सोसाइटी, प्रादेशिक रक्त सञ्चार केन्द्र भरतपुर, चितवनले गर्नेछ भने प्रवर्द्धकको रूपमा गैँडाकोट नगरपालिका रहेको छ।
