चितवनको रत्ननगर नगरपालिका वडा नम्बर १५ खोलेसिमलमा जुवातास खेलिरहेको अवस्थामा १४ जनालाई प्रहरीले पक्राउ गरेको छ। जिल्ला प्रहरी कार्यालय चितवनका सूचना अधिकारी चन्द्रभुसन यादवका अनुसार स्थानीय ५१ वर्षीय कृष्ण लामाको घरमा जुवातास खेल भइरहेको विशेष सूचनाका आधारमा प्रहरी टोलीले उनीहरूलाई नियन्त्रणमा लिएको हो।
गत साउन २८ गते दिउँसो १२ बजे प्रहरी वरिष्ठ नायव निरीक्षक जीवन सुनारीको कमाण्डमा खटिएको ‘क्याप’ टोलीले घरधनी लामाको भान्छाकोठामा छापा मारेको थियो। छापा मार्ने क्रममा घरधनी कृष्ण लामासहित रत्ननगर-१५ का भीमबहादुर तामाङ (३९) र अमन लामा (४६), कालिका-६ का वीरबहादुर तामाङ (५४), अमृत लामिछाने (४४), सूर्य मगर (५५), विष्णुलाल श्रेष्ठ (४४), सन्तोष लामिछाने (३९) र विजय थापा (४३) पक्राउ परेका हुन्।
यसैगरी कालिका-१ का चन्द्रकान्त सुवेदी (५२), कालिका-७ का राजु केसी (५२), भरतपुर-१५ का अमित गुरुङ (४३), तनहुँ देवघाट-१ का चन्द्र गुरुङ (३२) र गोरखा आरुघाट घर भई हाल रत्ननगर-१५ बस्ने मिठे सुर्खेती (३८) लाई पनि प्रहरीले जुवाको खालबाटै नियन्त्रणमा लिएको छ।
प्रहरीले जुवाको खालबाट १३ हजार ९५५ रुपैयाँ र पक्राउ परेका व्यक्तिहरूको साथबाट थप ६८ हजार ९५० रुपैयाँ गरी जम्मा ८२ हजार ९०५ रुपैयाँ नगद बरामद गरेको छ। साथै घट्नास्थलबाट ४ बुक तास र १४ थान मोबाइल समेत जफत गरिएको छ। पक्राउ परेका व्यक्तिहरू, नगद र मोबाइलसहित आवश्यक कानुनी प्रक्रियाका लागि प्रहरी चौकी खोलेसिमल तथा इलाका प्रहरी कार्यालय टाँडीको मुचुल्का टोलीलाई जिम्मा लगाई थप अनुसन्धान अघि बढाइएको प्रहरीले जनाएको छ।
