हेटौँडा उपमहानगरपालिका–४ हुप्रचौरमा अवस्थित प्रसिद्ध भुवनेश्वर पशुपति मन्दिरमा आज दर्शनार्थीको चाप देखिएको छ ।
मन्दिरमा हरेक वर्ष साउन महिनामा विशेष गरी सोमबार हेटौँडा र आसपासका क्षेत्रबाट ठूलो सङ्ख्यामा दर्शनार्थी आउने गरेको भुवनेश्वर पशुपति मन्दिर संरक्षण समितिका अध्यक्ष जगन्नाथ पाण्डेले जानकारी दिनुभयो ।
मन्दिरमा आउने दर्शनार्थीको उचित व्यवस्थापनसँगै उनीहरूलाई लक्षित गरी विभिन्न सङ्घसंस्थाबाट निःशुल्क पिउने पानी वितरणजस्ता कार्यहरू समेत भइरहेको उहाँले बताउनुभयो ।
पशुपतिनाथ मन्दिरकै स्वरूपमा निर्माण गरिएको १० कट्ठा सात धुर क्षेत्रफलको मन्दिर परिसरमा नवग्रहदेखि हनुमान, सरस्वतीलगायतका देवीदेवताका मूर्तिहरूसँगै अतिथि गृहसमेत छ । विसं २०४२ मा निर्माण गरिएको उक्त मन्दिरमा पशुपतिनाथको जस्तै पूजाविधि तथा परम्परा रहेको मन्दिरका पुजारी पवन घिमिरेले जानकारी दिनुुभयो ।
उहाँका अनुसार मन्दिरमा दर्शनार्थीलाई पशुपतिमा जस्तै भित्र मूर्तिसम्म नपुगी मूल प्रवेशद्वार बाहिरबाट नै पूजाआजा गर्ने व्यवस्था मिलाइएको छ ।
मन्दिरमा हरेक दिन नै भक्तजन आउने गरेको बताउँदै उहाँले साउनको सोमबार, शिवरात्रिलगायतका विशेष तिथि र पर्वमा भने एकै दिनमा २० हजारभन्दा बढी भक्तजनसम्म आउने गरेको जानकारी दिनुुभयो । उहाँका अनुसार मन्दिर विशेष पर्वका दिनमा आवश्यकता अनुसार खुल्ने भए पनि मङ्सिर, पुस र माघ महिनामा बिहान ५ः०० बजेदेखि १० बजेसम्म खुल्ने तथा बेलुका ४ः०० बजेदेखि ६ः०० बजेसम्म खुल्ने व्यवस्था मिलाइएको छ । यी तीन महिनाबाहेक अन्य महिनामा बिहान ४ः०० बजेदेखि १०ः०० बजेसम्म र बेलुका ५ः३० बजेदेखि ७ः०० बजेसम्म खुल्ने व्यवस्था मिलाइएको छ ।
समितिका अध्यक्ष पाण्डेका अनुसार भौतिक पूर्वाधार विकासका माध्यमबाट टाढाटाढाबाट आउने दर्शनार्थाीलाई सहयोग पु¥याउने लक्ष्यका साथ मन्दिरमा आवासको व्यवस्थासमेत गरिएको छ । बस्न चाहने दर्शनार्थीका लागि शय्याको सरसफाइ प्रयोजनका लागि प्रतिव्यक्ति रु २०० लिने गरिएको उहाँले जानकारी दिनुुभयो । रासस
