भारतको उत्तर प्रदेशस्थित लखीमपुर खीरीमा सोमबार बिहानभएको एक सडक दुर्घटनामा १० जनाको मृत्यु भएको छ।
तीव्र गतिमा गुडेको ट्रकले अगाडिबाट आइरहेको म्याजिक गाडीलाई सिधा ठक्कर दिँदा दुर्घटना भएको हो।
म्याजिकमा दुई महिलासहित कुल १० जना सवार थिए। दुर्घटनामा परेका सबै जनाको ज्यान गएको स्थानीय प्रहरीले जनाएको छ।
ठक्कर यति भीषण थियो कि म्याजिक गाडी घिस्रिँदै १० फिट टाढा पुगेर रोकिएको थियो। दुर्घटनामा गाडीभित्र रहेका मानिसहरूको टाउको र अनुहारमा गम्भीर चोट लागेको थियो भने कतिपय यात्रु सिटको बिचमै फसेका थिए।
ठक्करको जोडले दुई जना यात्रु सडकमा उछिट्टिएका थिए । दुर्घटनालगत्तै आसपासमा रहेका स्थानीय बासिन्दा घटनास्थलमा पुगेर प्रहरीलाई खबर गरी उद्धार कार्य सुरु गरेका थिए।
प्रहरीले घटनास्थलमा पुग्दा एक जना यात्रु जीवितै भेटिएपछि उनलाई तत्कालै नजिकैको अस्पताल पुर्याएको थियो। तर उपचारका क्रममा उनको पनि मृत्यु भयो।
प्रत्यक्षदर्शीका अनुसार म्याजिक गाडी लखीमपुरबाट सिसैयातर्फ जाँदै गर्दा बहराइचबाट आइरहेको ट्रकले अगाडिबाट ठक्कर दिएको थियो। तीव्र गतिमा रहेको ट्रक अचानक अनियन्त्रित भई म्याजिकमाथि बज्रिएको थियो। दुर्घटनालगत्तै ट्रक चालक भने मौका छोपेर फरार भएका छन्।
जिल्ला मुख्यालयभन्दा ४० किलोमिटर टाढा पीलीभीत–बस्ती राजमार्गको अदलीसपुर गाउँ नजिक यो दुर्घटना भएको हो। खमरियाका सीओ शमशेर बहादुर सिंहले प्रहरीले ट्रकलाई आफ्नो नियन्त्रणमा लिएको र फरार चालकको खोजी भइरहेको जानकारी दिएका छन्।
यसैबिच सामुदायिक स्वास्थ्य केन्द्र (सीएचसी) खमरियाका अधीक्षक डा। अमित कुमार सिंहले दुर्घटनापछि अस्पतालमा दुई महिला र सात पुरुषको शव ल्याइएको बताए। उनका अनुसार धेरैजसो शवहरू नराम्ररी कुच्चिएका थिए। एक जना गम्भीर घाइते पुरुषलाई थप उपचारका लागि जिल्ला अस्पताल रिफर गरिए पनि बाटोमै उनको मृत्यु भएको डा। सिंहले जानकारी दिए।
प्रहरीले सबै शवहरूलाई आफ्नो नियन्त्रणमा लिई पोस्टमार्टमका लागि पठाएको छ। -एजेन्सी
