नेपाल उद्योग परिसंघका अध्यक्ष वीरेन्द्रराज पाण्डेले महिलाको आर्थिक सशक्तिकरण र नेतृत्व विकासलाई दिगो आर्थिक प्रगतिको आधारका रूपमा अघि बढाउनुपर्ने बताएका छन्।
विराटनगरमा आयोजित महिला नेतृत्व सम्मेलनलाई सम्बोधन गर्दै अध्यक्ष पाण्डेले महिलालाई आर्थिक, सामाजिक र राजनीतिक रूपमा सक्षम बनाउने उद्देश्यले यस्तो कार्यक्रम आयोजना गरिएको स्पष्ट पारे। उनका अनुसार सम्मेलन केवल औपचारिक कार्यक्रम नभई महिलाको नेतृत्व विकास र नीतिगत सुधारका लागि अभियानका रूपमा सञ्चालन गरिएको हो।
उनले नेपाल उद्योग परिसंघले देशभर औद्योगिक वातावरण निर्माण, लगानी प्रवर्द्धन र रोजगारी सिर्जनामा महत्वपूर्ण भूमिका निर्वाह गर्दै आएको उल्लेख गरे। परिसंघले विभिन्न समिति र मञ्चमार्फत सरकारलाई अनुसन्धानमा आधारित नीतिगत सुझाव दिँदै आएको पनि उनले बताए।
अध्यक्ष पाण्डेका अनुसार महिला नेतृत्व सम्मेलनबाट प्राप्त सुझावहरूले तीनै तहका सरकारलाई महिलामैत्री नीति निर्माण तथा कार्यान्वयनमा सहयोग पुर्याउने विश्वास लिइएको छ। सम्मेलनमा विभिन्न क्षेत्रका सफल तथा प्रभावशाली व्यक्तित्वहरूको अनुभव आदान–प्रदानले महिलालाई प्रेरणा दिने अपेक्षा गरिएको उनले बताए।
उनले महिलाको आर्थिक पहुँच विस्तार गर्न वित्तीय साधनमा पहुँच बढाउनुपर्ने आवश्यकता औंल्याए। महिला उद्यमीका लागि कर्जा पहुँच सहज बनाउनुका साथै लघु, घरेलु तथा साना–मझौला उद्यमलाई लक्षित नीतिमा सुधार गर्नुपर्ने उनले बताए।
सरकारले महिलाको सशक्तिकरणका लागि आयकरमा छुट, जग्गा दर्तामा सहुलियत र महिला उद्यमशीलता कर्जा जस्ता व्यवस्था गरेको भए पनि ती नीतिहरू प्रभावकारी रूपमा कार्यान्वयन हुनुपर्नेमा उनले जोड दिए।
अध्यक्ष पाण्डेले राजनीतिक क्षेत्रमा महिलाको ३३ प्रतिशत सहभागिता न्यूनतम सीमा मात्र भएको उल्लेख गर्दै त्यसलाई थप विस्तार गर्नुपर्ने बताए। महिलालाई नीति निर्माण तहमा पर्याप्त प्रतिनिधित्व गराउनु आवश्यक रहेको उनको भनाइ छ।
उनले महिलाहरू कृषि, पर्यटन, सूचना प्रविधि र हस्तकला लगायत क्षेत्रमा सक्रिय हुँदै अर्थतन्त्रमा महत्वपूर्ण योगदान दिइरहेको उल्लेख गर्दै आर्थिक विकासमा उनीहरूको भूमिका अझै विस्तार गर्नुपर्ने बताए।
कार्यक्रममा उनले नेपालको करिब ४५ अर्ब डलरको अर्थतन्त्रलाई आगामी वर्षहरूमा १०० अर्ब डलरमा पुर्याउने लक्ष्यसहित परिसंघले अध्ययन गरिरहेको जानकारी दिए। निरन्तर ६ प्रतिशत आर्थिक वृद्धि हासिल गर्न सके करिब १३ वर्षभित्र उक्त लक्ष्य हासिल गर्न सकिने उनको भनाइ थियो।
सम्मेलन “दिगो समृद्धितर्फः कृषि, सीप, सिर्जनशीलता र डिजिटल नवप्रवर्तन” विषयमा केन्द्रित रहेको छ। कार्यक्रममा स्वदेशी उत्पादनको प्रदर्शनीसमेत राखिएको छ।
अध्यक्ष पाण्डेले सम्मेलनले महिला सशक्तिकरण, उद्यमशीलता प्रवर्द्धन तथा ‘मेक इन नेपाल’ अभियानलाई थप गति दिने विश्वास व्यक्त गरे। साथै कार्यक्रम सफल बनाउन सहयोग गर्ने सरकारी निकाय र सरोकारवाला संस्थाप्रति उनले धन्यवाद ज्ञापन गरे।
