नेकपा एमालेका नेता प्रदीप ज्ञवालीले कम्यूनिष्ट आन्दोलन खडेरीको दुबो जस्तै फेरी मौलाउने दाबी गरेका छन् ।
नेपाल कम्यूनिष्ट पार्टीको स्थापनाको ७७औँ वर्षको अवसरमा नेता ज्ञवालीले स्थापनाकाल देखि नै विभिन्न धक्का,विभाजन र विरोध भाषा खेपे पनि यो आन्दोलन दुबो जस्तै हरेक खडेरी र दलनलाई चिर्दै पुन मौलाउँदै आएको दाबी गरेका हुन् ।
ज्ञवालीले विगतको वर्ष कम्यूनिष्ट आन्दोलनका लागि सुखद नरहेको बताएका छन् । उनले यो असाधारण धक्कालाई आधार बनाएर केही व्यक्तिले आन्दोलन समाप्त भएको घोषणा गरेको उनले उल्लेख गरेका छन् ।
‘बिचार धाराको मृत्यु र इतिहासको अन्त्यको घोषणा गर्ने फुकुवामा अचेल आफ्ना भविष्यवाणीप्रति पछुताउदैछन् । हाम्रा फुकुयामाहरुका भविष्यवाणी पनि व्यर्थ साबित हुनेछन् । किनभने कम्यूनिष्ट आन्दोलनको स्थापना,अस्तित्व र भविष्य कसैको व्यक्तिगत इच्छाबाट होइन,समाजको ऐतिहासिक विकास क्रम,वर्ग संरचना र रूपान्तरणको वस्तुगत आवश्यकताबाट निर्दिष्ट छ,’ ज्ञवालीले लेखेका छन् ।
ज्ञवालीले कम्यूनिष्ट आन्दोलनले खेपेको वर्तमान धक्का र चुनौतीलाई सामान्य रूपमा लिने छुट आफूहरूलाई नभएको उल्लेख गरेका छन् । बरु पार्टी स्थापनाका बेलाका अभिभारा पुरा गर्नका लागि संकल्प गर्ने दिनका रूपमा आजको दिनलाई सम्झनु पर्ने उनको भनाइ छ ।
‘वर्तमानका धक्का र चुनौतीलाई सामान्य रूपमा लिने छुट हामीलाई छैन ।यसले हामीबाट निर्मम आत्मसमिक्षा,संरचनागत पुन संरचना,नयाँ डाइनामिक्सलाई बुझ्न र सामना गर्न सक्ने नयाँ ऊर्जाको माग गरिरहेको छ,’ ज्ञवालीले लेखेका छन् ‘७७औँ स्थापना दिवसको सन्दर्भमा संकल्प गरौँ हामी यी अभिभारा पूरा गर्दै आन्दोलनलाई नयाँ जीवन दिनेछौँ ।’
