पर्सीयन खाडीमा रहेको इराकको बसरा बन्दरगाह नजिक दुई विदेशी तेल ट्याङ्करमा विस्फोट भएपछि एक जनाको मृत्यु भएको छ । यस घटनामा चालकदल दर्जनौँ सदस्यलाई उद्धार गरिएको बताइएको छ ।
इराकी बन्दरगाहसम्बन्धी सरकारी निकायका अनुसार घटनापछि उद्धार टोलीले ती जहाजबाट ३८ जना चालकदल सदस्यलाई सुरक्षित बाहिर निकालेको छ । तर दुर्घटनामा एक जनाको ज्यान गएको पुष्टि गरिएको छ । अहिले पनि खोज तथा उद्धार कार्य जारी रहेको अधिकारीहरूले बताएका छन् ।
प्रारम्भिक जानकारीअनुसार विस्फोट कसरी भयो भन्ने अझै स्पष्ट भइसकेको छैन । बसरा क्षेत्रमा रहेको एक सुरक्षा स्रोतले अमेरिकी सञ्चारमाध्यमलाई दिएको जानकारी अनुसार विस्फोटक सामग्री राखिएको एउटा इरानी डुङ्गा तेल ट्याङ्करसँग ठोक्किएको हुन सक्ने आशङ्का गरिएको छ । यद्यपि यसबारे औपचारिक अनुसन्धान जारी रहेको बताइएको छ ।
जहाज ट्र्याक गर्ने वेबसाइटहरूले पनि दुवै ट्याङ्कर वरिपरि उद्धार डुङ्गाहरू घेरिएको देखाएको बताएका छन् । घटनापछि सुरक्षा जोखिमका कारण बसरा क्षेत्रका तेल बन्दरगाहहरूको सञ्चालन अस्थायी रूपमा रोकिएको इराकी अधिकारीहरूले जानकारी दिएका छन् ।
यसैबिच, पर्सीयन खाडी नजिकैको अर्को घटनामा ओमानको नौसेनाले स्ट्रेट अफ होर्मुज नजिक आक्रमणमा परेको थाइल्याण्डको झण्डा बोकेको जहाजबाट २० नाविकलाई उद्धार गरेको ओमानको सरकारी समाचार एजेन्सीले जनाएको छ ।
हालै मध्यपूर्व क्षेत्रमा बढ्दो तनावका कारण तेल ढुवानी मार्गको सुरक्षाबारे चिन्ता बढिरहेको छ । पर्सीयनको खाडी र स्ट्रेट अफ होर्मुज विश्वकै महत्त्वपूर्ण तेल आपूर्ति मार्ग हो । यस मार्ग भएर विश्वको २० प्रतिशत तेल ढुवानी हुन्छ । एजेन्सी
