मान्छेलाई पटकपटक आक्रमण गरेर ज्यान लिँदै आएको नरभक्षी बाघलाई बाराको अमलेखगञ्जबाट नियन्त्रणमा लिइएको छ। पर्सा राष्ट्रिय निकुञ्जका कर्मचारी, नेपाली सेना, स्थानीय जनप्रतिनिधिसहितको संयुक्त टोलीले शुक्रबार ‘डार्ट’ हानेर नरभक्षी बाघलाई नियन्त्रणमा लिइएको हो।
पर्सा राष्ट्रिय निकुञ्जका सूचना अधिकारी सन्तोषकुमार भगतले बाराको अमलेखगञ्जस्थित सामुदायिक वनबाट नरभक्षी बाघलाई नियन्त्रणमा लिइएको जानकारी दिए। ‘गत असारयता वन क्षेत्रमा चार जना मान्छेको मुत्यु भएको रहेछ। स्थानीयले बाघबाटै मृत्यु भएको भनेकाले उक्त बाघलाई प्राविधिक टोलीले डार्ट हानेर नियन्त्रणमा लिएका छौँ’, उनले भने, ‘बाघको आक्रमणबाट अमलेखगञ्ज आसपासका जनता त्रसित र डर, त्रास देखिएकाले पनि उक्त बाघलाई नियन्त्रणमा लिइएको हो।’
सूचना अधिकारी भगतले नियन्त्रणमा लिएको बाघलाई निकुञ्जको रेस्क्यू सेन्टरमा राखिएको जानकारी दिए। बाघ समात्नको लागी हात्तीसहित पर्सा राष्ट्रिय निकुञ्ज, डिभिजन वन कार्यालय बारा, नेपाल आर्मी, नेपाल प्रहरी र जीतपुरसिमरा उपमहानगरपालिका वडा नम्बर २१ का वडाअध्यक्ष सुभाष श्रेष्ठ र २२ का वडाअध्यक्ष शेखर काजी रुम्बा सहितको टोलीले लामो समय देखि निरन्तर प्रयास गरेका थिए।
