बिगत १० दिनदेखि बन्द रहेको गुण एयरको सेवा भरतपुर विमानस्थलमा पुनः सुरू हुन अझै दुई हप्ता लाग्ने भएको छ ।
जहाज मर्मतका लागि स्पेयर पार्टस् विदेशबाट ल्याइँदै र पाइट तालिममा रहेकाले तीन दिनदेखि उडान बन्द रहेको र सुरू हुन अझै दुई हप्ताजति लाग्ने गुण एयरलाइन्स भरतपुर विमानस्थलका स्टेशन इन्चार्ज कुलराज शर्माले नारायणी अनलाइनलाई जानकारी दिए ।
‘जहाजका मर्मतका लागि सिंगापुरबाट ल्याइने आवश्यक स्पेयर पार्टस् आइपुग्न केही समय लाग्ने भयो’, उनले भने । गत वर्ष भरतपुर काठमाडौँ तीन वटासम्म उडान गरेको गुण एयरलाइन्सले अहिले एउटा मात्र उडान गरेको छ । कहिलेकाहीँ चार्टर उडान भने गुणले गर्दे आइरहेको छ ।
गुणले अहिले भरतपुरसहित तुम्लिङटार, पोखरा, विराटनगर, भैरहवा, भरतपुर, सिमरालगायतका गन्तव्यमा नियमित उडान गर्दै आएको छ । भरतपुरमा गुणले उडान रोकेसँगै बुद्ध एयरको उडानमा एकाधिकार कायम रहेको छ ।
