कृषि ज्ञान केन्द्र चितवनका अनुसार चितवनमा एक लाख आठ हजार ५६७ किसान छन् । तीमध्ये ८४ हजार ८३३ जना अर्थात् ७८.१३ प्रतिशत किसानले निर्वाहमुखी कृषि पेशा गर्छन् भने एक हजार ४४६ किसानले मात्रै व्यावसायीक कृषि गरेको कृषि ज्ञान केन्द्र चितवनका प्रमुख युवराज पाण्डे बताउँछन् ।
जिल्लाका ८६ हजार २७९ जना अर्थात् ७९.५ प्रतिशत किसानले कृषि बिमा गरेकै छैनन् । कृषि बिमा गरेका २२ हजार ६८६ किसानमध्ये सबैभन्दा धेरै पशुपंक्षी उत्पादन गर्ने किसान १८.७ प्रतिशत अर्थात् २० हजार ३४५ जना छन् ।
कृषि ज्ञान केन्द्र चितवनका प्रमुख युवराज पाण्डेले बुधबार चालु आर्थिक वर्ष २०७९/८० को वार्षिक कार्यक्रममा परेका योजनाहरु सार्वजनिक गरेका छन् । उनका अनुसार ज्ञान केन्द्रलाई चालु आवको लागि कृषि विभाग, प्रदेश सरकार र प्रधानमन्त्री कृषि आधुनिकीकरण परियोजनाबाट गरी एकमुष्ट २१ करोड ८९ लाख चार हजार रुपैयाँ विनियोजन भएको छ ।
गत आवमा २२ करोड ५९ लाख ९२ हजार रुपैयाँ विनियोजन भएकामा ६६।२१ प्रतिशत बजेट खर्च भएको थियो । प्रदेश सरकारले ४४ लाख ५० हजार रुपैयाँ पुंजीगत र १६ करोड दुई लाख ७९ हजार चालु गरी जम्मा १६ करोड ४७ लाख २९ हजार रुपैयाँ विनियोजन गरेको छ ।
कृषि विभागले चार करोड ४९ लाख ५० हजार रुपैयाँ विनियोजन गरेको छ ।
राष्ट्रिय खाद्य सुरक्षा मिसनअन्तर्गत धानबाली प्रबद्र्धन कार्यक्रम र दलहन बाली प्रबद्र्धन कार्यक्रमका लागि गरी दुई करोड ५० लाख ५० हजार रुपैयाँ विनियोजन गरेको छ । रैथाने बाली प्रबद्र्धन कार्यक्रमका लागि एक करोड २० लाख, प्रांगारिक कृषि प्रबद्र्धन कार्यक्रमका लागि २९ लाख र वीउ विजन उत्पादन, आपूर्ती तथा व्यवस्थापनका लागि ५० लाख रुपैयाँ विनियोजन भएको उनले बताए । प्रधानमन्त्री कृषि आधुनिकीकरण परियोजनाले चालुतर्फ ९२ लाख २५ हजार रुपैयाँ विनियोजन गरेको छ ।
