थारु समुदायको बाहुल्यता रहेको चितवनको खैरहनी नगरपालिकाको वैशाख ३० गते हुने स्थानीय तहको निर्वाचनमा विभिन्न दलहरुले कुल ५९ जना थारु समुदायका उम्मेद्वार उठाएका छन् ।
नेकपा एमालेको सबैभन्दा धेरै थारु उम्मेद्वार रहेका छन् । नगरप्रमुखसहित १९ जना थारुले एमालेको तर्फबाट उम्मेदवारी दिएका छन् । लालमणि चौधरीले नगरप्रमुख पदमा दोश्रो कार्यकालको लागि उम्मेदवारी दिएका छन् भने ५ जनाले वडाअध्यक्षमा र १३ जनाले वडासदस्यमा उम्मेदवारी दिएका छन् । वडा नं. ७ मा मनेजर महतो, ८ मा शान्ति कुमारी चौधरी, ९ मा बन्धुराम चौधरी, १० मा कारीराम चौधरी र १२ मा कृष्णलाल चौधरीले एमालेको तर्फबाट वडाअध्यक्ष पदमा उम्मेदवारी दिएका छन् ।
नेपाली काँग्रेसले २ जना वडा अध्यक्ष र १३ जना वडासदस्य गरी १५ जना थारु उम्मेदवार उठाएको छ । वडा नं. ७ मा किरण चौधरी र वडा नं. १० मा चन्द्र विक्रम चौधरीले काँग्रेसको तर्फबाट वडाअध्यक्षमा उम्मेदवारी दिएका छन् ।
यस्तै राष्ट्रिय प्रजातन्त्र पार्टीले ५ जना वडाअध्यक्ष र ५ जना वडासदस्य पदमा उम्मेदवार उठाएको छ । वडा नं. ५ मा देवेन्द्र चौधरी, ६ मा यसरमिया चौधरी, ७ मा गीता चौधरी, ९ मा सुशील कुमार चौधरी र १३ मा भोला प्रसाद चौधरीले उम्मेदवारी दिएका छन् ।
यता नेकपा (माओवादी केन्द्र)ले एक जना वडाअध्यक्ष र ६ जना वडासदस्य गरी ७ जनालाई उम्मेद्वार बनाएको छ । वडा नं. १० मा रामेश्वर चौधरीले माओवादी केन्द्रको तर्फबाट वडाअध्यक्ष पदमा उम्मेदवारी दिएका छन् ।
यस्तै नेकपा (एकीकृत समाजवादी)ले ५ जनालाई वडासदस्य पदमा उठाएको छ । संघीय लोकतान्त्रिक राष्ट्रिय मञ्चबाट एकजनाले वडाअध्यक्षमा उम्मेदवारी दिएका छन् । रिखीराम चौधरीले वडा नं. १० को वडा अध्यक्ष पदमा उम्मेद्वारी दिएका हुन् ।
यस्तै स्वतन्त्रबाट एक जनाले वडासदस्य पदमा उम्मेदवार दिएका छन् छन् । उपप्रमुख पदमा रामेश्वर प्रसाद चौधरीले स्वतन्त्र उम्मेदवार दिएका छन् । पछिल्लो समयमा उनले गठबन्धनको उम्मेदवारलाई समर्थन जनाएका छन् । खैरहनी नगरपालिकामा १३ वडाहरु रहेका छन् ।
