चाँगुनारायण नगरपालिकाले प्रत्येक वडामा एक स्वास्थ्यचौकी एक प्रयोगशाला सञ्चालनको अभियान सुरु गरेको छ । नगरपालिका–८ स्थित सुडालको स्वास्थ्यचौकीमा पहिलो आधारभूत प्रयोगशाला शुभारम्भका क्रममा यो अभियान सुरु भएको जानकारी दिइएको हो ।
नगरप्रमुख सोमप्रसाद मिश्रले विगतमा पिछडिएको सुडालमा जनप्रतिनिधि निर्वाचित भएर आएसँगै विकासका लहर फैलिएको बताउनुभयो । उहाँले १० वटै वडाको स्वास्थ्यचौकीलाई स्तरोन्नति गरिनाका साथै सबै वडाका स्वास्थ्यचौकीमा प्रयोगशाला स्थापना अभियान सुरुआत गरिएको र सुडाल स्वास्थ्यचौकीमा पनि प्रयोगशाला सञ्चालनमा आएसँगै स्वास्थ्यचौकी मिनी अस्पतालको रुपमा परिणत भएको बताउनुभयो ।
नगर प्रमुख मिश्रले भन्नुभयो, “हामी जनप्रतिनिधि भएर आएपछि जनताको इच्छा, चाहना र आवश्यकतालाई बुझ्दै अगाडि बढ्यौँ, यहाँको भौतिक विकास मात्रै नभई शैक्षिक, स्वास्थ्य र रोजगारीका क्षेत्रमा देशभरिका पालिकामध्ये नमूनाको काम गरेका छौँ, स्वास्थ्यचौकीमा प्रयोगशाला स्थापनासँगै त्यहाँ एउटा मिनी अस्पताल निर्माण भएको छ ।”
वडाध्यक्ष परासर सापकोटाले स्वास्थ्यचौकीमा प्रयोगशाला स्थापना गर्ने नगरपालिकाको अभियानमा सुडाल स्वास्थ्यचौकी पहिलो भएको चर्चा गर्नुभयो । आर्थिक वर्ष २०७७-७८ मा नगरपालिकाले विनियोजन गरेको रकमबाट ल्याब सञ्चालनमा ल्याइएको बताउँदै उहाँले स्वास्थ्यचौकीलाई गुणस्तरीय बनाउन प्रयोगशालाले थप टेवा पु¥याउने बताउनुभयो ।
नगरपालिकाको स्वास्थ्य शाखा प्रमुख सत्यकुमार दुवालले अव स्वास्थ्यचौकीमा मधुमेह, युरिक एसिड, युरिया, क्रेटिनेन, बिल रूविन (जन्डिस), टोटल प्रोटिन, एल्बोमिन, टिजी, कोलेस्ट्रोल, हेमोग्लोबिन, आरए फ्याक्टर, सिआरपी टोटल काउन्ट, आरबिसी, इएसआर, युरिन, दिशा खकार जाँचटाइफाइड र एचआइभीको परीक्षण हुने बताउनुभयो । रासस
