चितवन, बैशाख २५ कोरोना भाइरस (कोभिड–१९) को नयाँ भेरियन्ट तीव्र रुपमा फैलिरहेकाले यसको जोखिमलाई कम गर्न जिल्ला प्रशासन कार्यालय चितवनले बैशाख १५ देखि निषेधाज्ञा जारी गरेको छ । निषेधाज्ञामा अत्यावश्यक बाहेकका सबै व्यावासय तथा यातायात बन्द गरिएको छ । बैंक तथा वित्तीय संस्थाहरु खोल्न दिइएको छ भने खाद्य पसलहरु बिहान ९ बजेसम्म खुलेका छन् । यस्तो अवस्थामा निषेधाज्ञालाई प्रभावकारी बनाउन सडकमा सुरक्षाकर्मीहरु परिचालन गरिएको छ ।
सामाजिक संस्था सक्षम नेपाल अभियानले शुक्रबार चितवनका सडकमा खटिएका सुरक्षाकर्मीहरुलाई सेनिटाइजर, पानी, चाउचाउ र जुस वितरण गरेको छ । पुलचोकबाट सुरु भएको खाजापानी वितरण कार्यक्रम सहिदचोक, लायन्सचोक, चौविसकोठी, हाकिमचोक, बाइपास रोड हुँदै रामनगर पुगेर टुङ्गिएको थियो ।
सक्षम नेपाल अभियानका संयोजक प्रकाश थापा र सदस्यहरु रोजिना त्रिपाठी, आकांक्षा पोख्रेल र दिपक गौतम वितरण कार्यमा सक्रिय थिए । भोलि वा पर्सिमा सुरक्षाकर्मीहरुलाई पुनः प्रयोग गर्न मिल्ने खालको पन्जा वितरण गरिने अध्यक्ष थापाको भनाइ छ ।
समाजिक कार्यमा सक्रिय रहेको सो संस्थाले यसअघि पनि विभिन्न कार्यक्रम गर्दै आएको छ । संस्थाले यसअघिको निषेधाज्ञामा एकछाक खान धौधौ परेकाको घरमा खाद्यान्न सहयोग, दृष्टिबिहिनहरुलाई खाद्यान्न सहयोग, बेसाहारा बेवारिसेहरुलाई खाना खुवाउनुका साथै परिवारसँग पुनर्मिलन गराउने काम गरेको थियो ।
