जनता समाजवादी पार्टी (जसपा) का संघीय परिषद् अध्यक्ष डा.बाबुराम भट्टराईले प्रधानमन्त्री ओलीको कदम असंवैधानिक र अधिनायक भएको बताएका छन् । उनले यो कदम सच्याउन लोकतन्त्रका लागि सात सालदेखि लडेको कांग्रेस नेतृत्वले भने ढुलमुल गरिहेको बताए ।
‘‘कांग्रेस सात सालदेखि लोकतन्त्रका लागि लडेको पार्टी हो, उसले लोकतन्त्र ल्याउन महत्त्वपूर्ण भूमिका खेलेको पनि हो,” डा. भट्टराईले भने, “अहिले हामी प्रतिगमनविरुद्ध लोकतन्त्र ल्याउन सहकार्यका लागि तयार छौं । तर, कांग्रेस नेतृत्व अहिलेको प्रतिगमनविरुद्ध उभिन ढुलमुल गरिरहेको छ, झर्ला र खाउँला प्रवृति देखाउँदै छ ।” उनले प्रधानमन्त्री ओलीमा प्रतिगामी चरित्र रहेको भन्दै त्यसलाई सच्याउन सबै एकजुट हुनुपर्ने बताए ।
