इटालीको सिरी ए लीग आगामी १३ जुनमा सुरु गर्ने तयारी भइरहेको छ । तर यसका लागि इटलीको सरकारले स्वीकृति दिनुपर्नेछ ।
यदी सरकारले स्वीकृति दिए १३ जुनबाट सिरी ए फेरि सुरु गर्ने योजना रहेको छ ।
बुधबार भिडियो कन्फ्रेन्समार्फत लिगको जेनेरल एसम्लिले सरकारको निर्णय र मेडिकल प्रोटोकल अनुसार लिग फेरि सुरु गर्ने मिति बारे निर्णय गरेको बीबीसीले जनाएको छ ।
मेडिकल प्रोटोकल अनुसार कुनै टिमको एक खेलाडी र वा स्टाफ मात्रैलाई कोभिड १९ पोजिटिभ देखिए पूरै टिम नै दुई साता क्वारेन्टिनमा बस्नुपर्ने छ ।
इटालियन सिरी ए को शीर्ष डिभिजनका क्लबहरु मे महिनामा ट्रेनिङमा फर्किएका छन् । तर खेलाडीहरुले व्यक्तिगत रुपमा मात्र ट्रेनिङ गर्न पाउनेछन् ।
विश्वभर महामारीको रुपमा रहेको कोभिड–१९ ले गर्दा सिरी ए ८ मार्च देखि स्थगित गरिएको छ ।
