विश्वभर तीव्र गतिमा फैलिरहेको कोरोना भाइरस (कोभिड–१९) लाई मध्यनजर गर्दै उपराष्ट्रपति नन्दबहादुर पुन सार्वजनिक कार्यक्रममा सहभागि नहुने भएका छन् ।
कोरोनाको सम्भावित प्रकोपलाई दृष्टिगत गर्दै उपराष्ट्रपति पुनले निश्चित भइसकेका सार्वजनिक कार्यक्रम स्थगन गर्नुको साथै थप कार्यक्रम नलिन नीजि सचिवालयलाई निर्देशन दिइ सकेको उपराष्ट्रपतिका प्रेस संयोजक मनोज घर्तीमगरले जानकारी दिए ।
उपराष्ट्रपतिको निर्देशन र कोभिड–१९को सम्भावित प्रकोप रोक्न सरकारले बनाएको योजनालाई दृष्टिगत गर्दै पूर्वनिर्धारित सार्वजनिक कार्यक्रमहरु स्थगन गरिएको उनले बताए ।
सरकारले कोभिड–१९ को सम्भावित प्रकोप न्यूनीकरण र सहज अवस्था सृजना भएको बारे सार्वजनिक जानकारी नगराएसम्म उपराष्ट्रपति अत्यावश्यक बाहेकका सार्वजनिक कार्यक्रममा सहभागी हुने छैनन् । साथै, उपराष्ट्रपति पुनले कोभिड–१९ को सम्भावित प्रकोप नियन्त्रण सम्बन्धी सरकारको योजनामा सघाउन अपील गर्दै नआत्तेर सावधानी अपनाउन सबैलाई आग्रह गरेका छन् ।
