नवलपुरमा एसईईको पुरक परीक्षाका लागि तोकिएका चार परीक्षा केन्द्रमा सेनेटरी प्याड राखिने भएको छ ।
एसईईको ग्रेड वृद्धिका लागि परीक्षा हुने केन्द्रहरुमा सेनेटरी प्याड राखिने भएको हो । जिल्लाको सदरमुकाम स्थित शिव मावि, ज्ञानोदय मावि, जीवन ज्योति मावि र शहीद स्मृति माविमा एसईई गे्रडवृद्धिको लागि परीक्षा केन्द्र तोकिएको छ । यी परीक्षा केन्द्रमा छात्राहरुका लागि सेनेटरी प्याडको व्यवस्था गर्न लागिएको हो । आइतबार शिक्षा विकास तथा समन्वय इकाई नवलपुरका प्रमुख कृष्णचन्द्र पोखे्रलले केन्द्र तोकिएका विद्यालयका केद्राध्यक्षहरुलाई सेनेटरी प्याड प्रदान गरेका छन् ।
परीक्षा चलिरहँदा महिनावारी भएका छात्राहरु हतोत्साही हुने र परीक्षानै बिगार्ने गरेकाले उनीहरुको सहजता र आत्मबल वृद्धिका लागि सबै परीक्षा केन्द्रमा परीक्षा अवधिभर सेनेटरी प्याड राख्ने प्रबन्ध मिलाएको इकाइ प्रमुख पोखे्रलले बताए । यसले छात्राहरुमा हुने मनोवज्ञानिक असरलाई कम गरी सहज रुपमा परीक्षा प्रदान गर्ने वातावरण सिर्जना गर्ने उनले बताए । जागृति बाल तथा युवा सरोकार नेपालले सेनेटरी प्याड उपलब्ध गराएको हो । संस्थाले पछिल्लो समयमा किशोरीहरुमा आत्मरक्षा, किशोरी शिक्षालाई जोड दिँदै आएकाले परीक्षा केन्द्रमा समेत किशोरीहरुलाई पर्न सक्ने समस्याको निराकरणका लागि सेनेटरी प्याड उपलब्ध गराएको संस्थाका महासचिव दिपक शर्माले बताए ।
चारवटै केन्द्रमा सेनेटरी प्याडको व्यवस्था गर्ने गरी केद्राध्यक्षहरुलाई सेनटरी प्याड प्रदान गरिएको हो । भदौ १ गते देखि ११ गतेसम्म सञ्चालन हुन गइरहेको एसईई गे्रड वृद्धिको परीक्षाका लागि नवलपुरबाट एक हजार ३१३ जनाले आवेदन दिएका छन् । आवेदन दिएका मध्ये आधा जति छात्रा रहने अनुमान गरी सोही आधारमा सबै केन्द्रमा सेनेटरी प्याड राखिने छ । चारवटा केन्द्रका लागि एक हजार ९२० थान प्याड प्रदान गरिएको छ ।
भदौं १ गतेबाट हुने परीक्षामा ज्ञानोदय माविबाट ३२३, जीवन ज्योति माविबाट २९७, शहीद स्मृति माविबाट ३०२ र शिव माविबाट ३९१ विद्यार्थीले गे्रडवृद्धिका लागि सहभागिता जनाउँदै छन् । ग्रेड वृद्धिका लागि सबैभन्दा धेरै गणित विषयमा एक हजार ९० जनाले परीक्षा दिँदै छन् ।
