भोटेकोशी बाढीबाट प्रभावित परिवारको राहत तथा पुनर्निर्माणका लागि नेपाली मुस्लिम समाज सुनसरीले रु ६२ लाख ४५ हजार ४९ सहयोग गरेको छ ।
सुनसरीका विभिन्न मुस्लिम बस्ती, मदरसा, मस्जिद, गैरसरकारी संस्था, निजी विद्यालय, व्यावसायिक सङ्घसंस्था तथा व्यक्तिगत तहबाट उक्त रकम सङ्कलन गरिएको नेपाली मुस्लिम समाज सुनसरीका उपाध्यक्ष हैदर अलीले जानकारी दिनुभयो ।
नेपाल मुस्लिम समाज सुनसरीको समन्वयमा सङ्कलित उक्त रकम प्रधानमन्त्री दैवी प्रकोप उद्धार कोषमा जम्मा गरी बिहीबार बैंक भौचर तथा सहयोगदाताको विस्तृत विवरणसहितका कागजात सुनसरीका प्रमुख जिल्ला अधिकारी ईश्वरीप्रसाद अर्याललाई हस्तान्तरण गरिएको उहाँले बताउनुभयो ।
तीन स्वास्थ्य संस्थालाई प्रसूति बेड
सानिमा बैंकले सुनसरीका तीन स्वास्थ्य संस्थालाई सुरक्षित प्रसूति बेड प्रदान गरेको छ । सानिमा बैंक लिमिटेड इनरुवा शाखाले संस्थागत सामाजिक उत्तरदायित्व कार्यक्रमअन्तर्गत जिल्लाका तीन स्वास्थ्य संस्थालाई सुरक्षित प्रसूति बेड र एक विद्यालयलाई तातो तथा चिसो पानीसहितको वाटर फिल्टर सेट प्रदान गरेको हो ।
बैंकका इनरुवा शाखा प्रमुख गायत्रीप्रसाद सुवेदीका अनुसार इनरुवा–६ स्थित मधेशा स्वास्थ्यचौकी, भोक्राहा नरसिंह–७ स्थित नरसिंह स्वास्थ्यचौकी र भोक्राहा–२ स्थित भोक्राहा स्वास्थ्यचौकीलाई सुरक्षित प्रसूति बेड उपलब्ध गराइएको हो ।
त्यसैगरी, बैंकले इनरुवास्थित भगवती माध्यमिक विद्यालयमा स्वच्छ खानेपानीका लागि वाटर फिल्टर सेट प्रदान गरेको उहाँले जानकारी दिनुभयो । सानिमा बैंकले संस्थागत सामाजिक उत्तरदायित्व सीएसआर कार्यक्रम अन्तर्गत शिक्षा, स्वास्थ्य, मानवीय हित, वित्तीय साक्षरतालगायतका क्षेत्रमा हरेक वर्ष सहयोग गर्दै आएको शाखा प्रमुख सुवेदीले बताउनुभयो ।रासस
