भरतपुर महानगरपालिका वडा नं.१० ले वातावरणको क्षेत्रमा महत्वपूर्ण योगदान दिने दुई टोल विकास संस्थालाई सम्मान गरेको छ ।
विश्व वातावरण दिवसको अवसर पारेर वडा कार्यालयले हिमाली टोल विकास संस्था र दोभान कालिका नमुना टोल विकास संस्थालाई सम्मान गरेको हो ।
कार्यवाहक वडा अध्यक्ष रेशम राज थापा (ऋषि)ले वातावरणको क्षेत्रमा राम्रो काम गर्ने टोल विकास संस्थालाई प्रोत्साहन स्वरुप सम्मान गरिएको बताउनुभयो । ‘यसपटकबाट वडाले यो सम्मानको सुरुवात गरेको छ, यसले आगामि दिनमा अन्य टोल विकास संस्थाहरुलाई पनि वातावरणको पक्षमा राम्रो काम गर्न प्रोत्साहन मिल्नेमा विश्वास छ’–कार्यवाहक वडा अध्यक्ष थापाले भन्नुभयो ।
कार्यक्रममा हिमाली टोल विकास संस्थाका अध्यक्ष प्रजिल श्रेष्ठ र दोभान कालिका नमुना टोल विकास संस्थाका अध्यक्ष दिवाकर ढकाललाई कार्यवाहक वडा अध्यक्ष थापाले सम्मान पत्र प्रदान गर्नुभएको थियो ।
सम्मान कार्यक्रममा वडा सदस्य सूर्य बदना हमाल, वडा सचिव माधव सुवेदी, प्रवीण खतिवडा, विभिन्न टोल विकास संस्थाका अध्यक्ष तथा प्रतिनिधिहरुको सहभागिता रहेको थियो ।
यस्तै वडाले वातावरण दिवसकै अवसर पारेर गेष्ट हाउस चौर क्षेत्रमा सरसफाईसंगै वृक्षरोपण समेत गरेको छ ।
