पश्चिमी जापानको वाकायामा प्रान्तको दक्षिणी भागमा बुधबार टाइफुन ‘जाङ्मी’ ले अवतरण गरेको छ। जापानको मौसम विज्ञान विभाग (JMA) ले देशका विभिन्न क्षेत्रमा बाढी र पहिरोको उच्च जोखिम देखिएपछि व्यापक सतर्कता अपनाउन आग्रह गरेको छ।
विभागका अनुसार वाकायामा हुँदै बग्ने कोजा नदीमा बाढीको खतरा बढेकाले आपतकालीन स्तरको चेतावनी जारी गरिएको छ। स्थानीय अधिकारीहरूले नदीको जलस्तर तीव्र रूपमा बढ्न सक्ने भन्दै आसपासका बासिन्दालाई सतर्क रहन र सुरक्षित स्थानमा जान आग्रह गरेका छन्।
JMA ले पश्चिमी र पूर्वी प्रशान्त क्षेत्रहरूमा अत्यधिक भारी वर्षा हुने पूर्वानुमान गरेको छ। वर्षासँग सम्बन्धित बाढी, पहिरो र अन्य प्राकृतिक विपद्को जोखिम उच्च रहेको चेतावनी पनि दिइएको छ।
पूर्वानुमान अनुसार आगामी २४ घण्टामा कान्टो–कोशिन र टोकाई क्षेत्रमा करिब २०० मिलिमिटर तथा तोहोकु क्षेत्रमा करिब १२० मिलिमिटर वर्षा हुन सक्नेछ।
यसैबीच टोकियोका विभिन्न नदीहरूमा समेत बाढीको चेतावनी जारी गरिएको छ। अधिकारीहरूले आवश्यक नभएसम्म घरबाहिर ननिस्कन र स्थानीय निर्देशन पालना गर्न आग्रह गरेका छन्। एजेन्सी
