कृष्णपुर नगरपालिका-१ दोमिल्लामा योग भवन निर्माण अन्तिम चरणमा पुगेको छ । वडा कार्यालय र नगरपालिकाको रु १८ लाखको संयुक्त लगानीमा निर्माण भइरहेको भवनको हालसम्म ९० प्रतिशत काम सम्पन्न भएको हो ।
कृष्णपुर-१ का वडाध्यक्ष मोहन बस्नेतले योग तथा व्यायामप्रति नागरिकको आकर्षण बढाउँदै स्वस्थ बनाउने उद्देश्यले भवन निर्माण थालिएको बताउनुभयो । “जनस्वास्थ्य र शारीरिक व्यायामलाई प्राथमिकतामा राखेर भवन निर्माण गरिरहेका छौँ”, उहाँले भन्नुभयो, “यो भवनलाई बहुउद्देश्यीय रूपमा प्रयोग गर्न सकिनेछ, बिहान र बेलुकाको समयमा योग अभ्यास तथा व्यायामका लागि प्रयोग हुनेछ भने दिउँसो विभिन्न सामाजिक तथा सामुदायिक कार्यक्रम सञ्चालन गर्न सकिनेछ ।”
वडाध्यक्ष बस्नेतका अनुसार भवनलाई आवश्यकता अनुसार पार्टी प्यालेसका रूपमा समेत प्रयोग गर्न सकिने गरी संरचना निर्माण भइरहेको छ । स्थानीयस्तरमा सभा, गोष्ठी, तालिम तथा सामुदायिक कार्यक्रम सञ्चालनका लागि उपयुक्त स्थानको अभाव भइरहेका बेला भवनले बहुआयामिक उपयोगिता दिने अपेक्षा गरिएको उहाँले बताउनुभयो ।
योसँगै भवन परिसरमा रहेको खुला चौरलाई आगामी दिनमा पार्कका रूपमा विकास गर्ने योजना वडा कार्यालयले अघि सारेको छ । सीमित बजेटका कारण सबै संरचना एकैपटक निर्माण गर्न नसकिए पनि आगामी वर्षहरूमा आवश्यक पूर्वाधार थप्दै जाने योजना रहेको वडाध्यक्ष बस्नेतले जानकारी दिनुभयो ।
“यहाँ पर्याप्त खुला चौर छ, यसलाई पार्कका रूपमा विकास गर्ने योजना बनाएका छौँ”, उहाँले भन्नुभयो, “वडासँग सीमित बजेट हुने भएकाले धेरै संरचना एकैपटक निर्माण गर्न सकेका छैनौँ , तर, चरणबद्ध रूपमा यस क्षेत्रलाई व्यवस्थित गर्दै आन्तरिक पर्यटन प्रवर्द्धन गर्ने योजना छ ।”
स्वास्थ्यकर्मी योगेन्द्र साउँदले योग भवन निर्माण भएपछि नियमित व्यायाम गर्ने नागरिकलाई सहज हुने बताउनुभयो । हाल स्थानीयवासी खुला चौरमा व्यायाम तथा योग अभ्यास गर्दै आएका छन् । रासस
