अष्ट्रेलियाले १६ वर्ष मुनिका बालबालिकालाई सामाजिक सञ्जाल प्रयोग गर्न विश्वमै पहिलो पटक पूर्ण प्रतिबन्ध लगाउँदैछ। यो कानुन डिसेम्बर १०, २०२५ बाट लागू हुनेछ।
फेसबुक, इन्स्टाग्राम, टिकटक, स्न्यापच्याट, एक्स, युट्युब, रेडिट, थ्रेड्स, किक र ट्विच जस्ता प्लेटफर्ममा १६ वर्षभन्दा कम उमेरका बालबालिकाले खाता राख्न वा सञ्चालन गर्न पाउने छैनन्।
मेटा कम्पनी ९फेसबुक, इन्स्टाग्राम र थ्रेड्सको मालिक० ले डिसेम्बर ४ देखि नै १६ वर्ष मुनिका अष्ट्रेलियाली प्रयोगकर्तालाई सूचना पठाएर खाता बन्द गर्न थालिसकेको छ। यसबाट करिब ५ लाख किशोरकिशोरी प्रभावित हुने अनुमान छ।
यो कानुनको मुख्य उद्देश्य बालबालिकालाई स्क्रिनको लत र हानिकारक सामग्रीबाट जोगाउनु हो। कम्पनीहरूले बायोमेट्रिक प्रविधि, व्यवहार विश्लेषण वा सरकारी कागजात जाँच जस्ता विधिबाट उमेर प्रमाणीकरण गर्नुपर्नेछ। नियम उल्लङ्घन गरेमा कम्पनीलाई चार करोड ९५ लाख अस्ट्रेलियाली डलरसम्म जरिवाना हुन सक्छ।
सञ्चार मन्त्री अन्निका वेल्सले भनेकी थिइन्, ‘रोलआउट क्रममा अलि अव्यवस्थित देखिनेछ। ठुला सुधारहरू सधैं हुन्छन्।’
युट्युब किड्स, ह्वाट्सएप, डिस्कर्ड, रोब्लोक्स, म्यासेन्जर किड्स जस्ता प्लेटफर्म यो प्रतिबन्धमा पर्दैनन्। प्रधानमन्त्री एन्थोनी अल्बानीजले भनेका छन्, ‘बालबालिकाले आफ्नो बाल्यकाल बिताओस्।’
आलोचकहरूले गोपनीयता जोखिम र किशोरकिशोरीलाई अझ खतरनाक अनलाइन ठाउँतर्फ धकेल्ने चिन्ता व्यक्त गरेका छन्। तर पछिल्ला सर्वेक्षणमा ७७ प्रतिशतभन्दा बढी अष्ट्रेलियालीले यो कानुनको समर्थन गरेका छन्। डेनमार्क, न्यूजील्याण्ड र केही युरोपेली देशहरूले पनि यस्तै कदम चाल्ने तयारी गरेका छन्।
यो कानुनले विश्वव्यापी डिजिटल नीतिमा ठुलो परिवर्तन ल्याउन सक्ने विश्लेषकहरूले बताएका छन्। एजेन्सी
