दक्षिण कोरियाको जंगलमा लागेको भीषण डढेलोमा हालसम्म कम्तीमा २७ जनाको मृत्यु भएको छ ।
दक्षिण कोरियाली गृह मन्त्रालयले बिहीबार विज्ञप्ति जारी गर्दै यो जानकारी दिएको हो । स्थानीय अधिकारीहरूले मृतकमध्ये धेरैजसो ६० देखि ७० वर्षका रहेको जनाएका छन् ।
जंगल लागेको भीषण डढेलोमा परी ३२ जना घाइते भएका छन् । यसअघि डढेलोमा २६ जनाको मृत्यु र ३० जना घाइते भएको पुष्टि भएको थियो ।
डढेलोका कारण हजारौँ मानिस विस्थापित भएका छन् । डढेलोबाट धेरै प्राचीन स्थलहरू पनि प्रभावित भएको जनाइएको छ । यसमा १ हजार ३०० वर्ष पुरानो बौद्ध मन्दिर पनि समावेश छ, जुन जंगलमा भएको डढेलोका कारण नष्ट भएको थियो ।
डढेलो दक्षिण कोरियाको दक्षिण–पूर्वी जंगलहरूमा लागेको जनाइएको छ । मार्च २१ बाट लागेको आगो अझै नियन्त्रणमा आएको छैन । डढेलो एक हप्ताभित्र ३५ हजार हेक्टरभन्दा बढी जंगल फैलिएको छ ।
तीव्र हावा र सुख्खा जमिनका कारण आगो द्रुत गतिमा फैलिएको जनाइएको छ । तीव्र हावाका कारण हेलिकोप्टर उडाउन कठिन भएको छ । मंगलबार आगो निभाउने प्रयास गर्दा हेलिकोप्टर दुर्घटनाग्रस्त भएको थियो ।
