भारतको उत्तर प्रदेश राज्यको सुल्तानपुरस्थित एक अस्पतालका हार्थोपेडिक विशेषज्ञको चरम लापरबाही बाहिर आएको छ ।
डाक्टरले वृद्धाको भाँचिएको खुट्टाको शल्यक्रिया गर्नुको सट्टा अर्को खुट्टाको शल्यक्रिया गरेका छन् । बिहीबार भुइँलादेवी नाम गरेकी वृद्धा बायाँ खुट्टा भाँचिएपछि उपचारका लागि अस्पताल पुगेकी थिइन् ।
चिकित्सकले आवश्यक परीक्षणपछि अप्रेसनको तयारी गरे । अप्रेसनपछि महिलालाई बाहिर ल्याउँदा परिवारजन छक्क परे ।
किनकि बायाँ खुट्टा भाँचिएर अस्पताल ल्याइएकी भुइँलादेवीको दायाँ खुट्टाको अप्रेसन गरिएको थियो ।
भुइँलादेवीका छोरा सुरेश प्रजापतिकाअनुसार बायाँ खुट्टा भाँचिएको थियो तर, डाक्टरले दायाँ खुट्टाको अप्रेसन गरिदिएका थिए ।
परिवारजनले यसबारे सोधपुछ गर्न थालेपछि भुइँलादेवीलाई फेरि अप्रेसनका लागि लगिएको र बायाँ खुट्टाको अप्रेसन गरिएको भारतीय अखबार आजतकले जनाएको छ ।
अप्रेसन गर्ने चिकित्सक पीके पाण्डेय सम्पर्कविहीन भएका छन् । अस्पताल प्रशासनले भने चिकित्सकको लापरबाही नभएको दाबी गरेको छ ।
अस्पताल सञ्चालक डा. आशुतोष श्रीवास्तवकाअनुसार बिरामीको बायाँ खुट्टाको हड्डी भाँचिएको थियो, जसको अप्रेसन गरिएको छ ।
दायाँ खुट्टामा रगत जमेका कारण त्यसलाई निकालिएको भन्दै उनले गलत उपचार भएको आरोपको खण्डन गरेका छन् ।
