चितवन मेडिकल कलेज र हंस सहकारीबीच सहकारी सदस्यलाई छुट दिनेसम्बन्धी सम्झौतापत्रमा हस्ताक्षर भएको छ ।
आज बिहीबार संस्थाका अध्यक्ष दिनेशकुमार चुके र चितवन मेडिकल कलेजका तर्फबाट अस्पतालका निर्देशक प्रा.डा. दयाराम लम्सालले सम्झौता पत्रमा हस्ताक्षर गरेका हुन् ।
भरतपुरको नारायणगढमा प्रधान कार्यालय रहेको हंस बहुउद्देश्यीय सहकारीका सदस्यहरुले चितवन मेडिकल कलेज(सीएमसी)मा उपचारका लागि २० प्रतिशत छुट पाउने सम्झौतामा उल्लेख छ ।
छुट सेवा लिनका लागि हंस बहुउद्देश्यीय सहकारीले जारी गरेको कार्ड लिएर अस्पतालमा जानुपर्ने जनाइएको छ । त्यसैगरी सहकारीले आयोजना गरेको कुनै पनि स्वास्थ्यसम्बन्धी कार्यक्रममा अस्पतालले आवश्यक स्वास्थ्यसम्बन्धी जनशक्ति उपलब्ध गराउने सम्झौता भएको छ । सम्झौताका सम्बन्धमा चितवन मेडिकल कलेजका अप्रेसन व्यवस्थापक पारस अधिकारीले जानकारी गराएका छन् ।
सो सम्झौता २०८१ वैशाख १ गतेदेखि सुरु भई २०८४ चैत ३० गतेसम्म लागू हुनेछ । सो अवसरमा हंस सहकारीका सचिव शारदा शर्मा पौडेल, कोषाध्यक्ष प्रमोदकुमार श्रेष्ठ, सञ्चालक सदस्य प्रा.डा. होमनाथ सापकोटा संस्थाका प्रबन्धक नारायण प्रसाद सापकोटालगायतको उपस्थिति रहेको छ ।
यसैगरी होटल व्यवसायी महासंघ नेपाल र चितवन मेडिकल कलेजबीच महासंघमा आवद्ध व्यवसायी, कर्मचारी र आश्रित परिवारका लागि उपचारमा छुट सम्झौंता गरिएको महासंघका अध्यक्ष दिनेश कुमार चुकेले जानकारी दिए ।
