नेपाली कांग्रेसका महामन्त्री गगन थापाले अर्थविद् डा.स्वर्णिम वाग्लेले पार्टीलाई लात हानेको आरोप लगाएका छन् । उनले पार्टीभित्र संघर्ष गरेर बस्न तयार नहुनेहरू कांग्रेस हुन नसक्ने बताए ।
सोमबार कांग्रेस नेता गोविन्द भट्टराईको उमेदवारी दर्ता कार्यक्रममा सहभागी हुन तनहुँ क्षेत्र नम्बर–१ मा पुगेका गगनले यस्तो बताएका हुन् । आसन्न उपनिर्वाचनमा भट्टराई सत्ता गठबन्धनतर्फका साझा उमेदवार बनेका छन् ।
कांग्रेसलाई लात हानेर बाहिरबाट ‘कांग्रेस खराब छ’ भन्दैमा लोकतन्त्र सुदृढ नहुने महामन्त्री थापाले बताए । “यसपटक चुनावमा जाँदा एउटा गीत बजेको सुन्नुहुनेछ, पुराना पार्टी खराब भए भनेर । नो नट अगेन भनेर पहिलोपटक २० सिट ल्याएर आएको हामीले हेर्यौँ,’ उनले डा.वाग्लेतर्फ संकेत गर्दै प्रश्न गरे, “हामी पनि एउटा सपना लिएर राजनीतिमा आएका छौँ । हामीलाई पनि पार्टी बदल्ने चाहना छ, नेपाली कांग्रेस । कांग्रेसभित्र जे भइरहेको छ, त्यो सबै त ठिक भइरहेको छैन । तर, नेपाली कांग्रेसलाई लात हानेर गएर बाहिरबाट कांग्रेस खराब भनेर ढुंगा हानेर, झ्याल फुटाएर कांग्रेस बदलिन्छ ?”
