चितवन, असोज ११ –
चितवनमा रहेको सरकारी अस्पताल भरतपुर अस्पतालका मेडिकल सुपरिटेण्डेण्ट (मेसु) प्राडा कृष्णप्रसाद पौडेलले निजी अस्पतालमा रहेको आफ्नो नामको साइनबोर्ड हटाएका छन् ।
उनले भरतपुरको अस्पताल रोडमा रहेको निजी अस्पताल भरतपुर सामुदायिक अस्पतालको आफ्नो कार्यकक्षको ढोकामा रहेको आफ्नो नामको बोर्ड हटाएका हुन् ।
अस्पतालभित्र छिर्ने बित्तिकै देबे्र पट्टीको पहिलो नम्बर कोठामा प्राडा पौडेलको कार्यकक्ष रहेको छ । उनी भरतपुर सरकारी अस्पतालका दशौं तहका वरिष्ठा हाडजोर्नी तथा मेरुदण्ड विशेषज्ञ समेत हुन् । उनले मेसु हुनुअघि र अहिले पनि निजी अस्पतालमा काम गर्छन् ।
यससम्बन्धि समाचार हिजो नारायणी अनलाइनले प्रकाशित गरेपछि पौडेलले निजी अस्पतालबाट आफ्नो नामको साइन बोर्ड हटाएका हुन् ।
हिजोसम्म उक्त मेरुदण्ड तथा नशा हाडजोर्नी विभागको कार्यकक्षमा प्राडा पौडेल र डा रमेश थापा मगरको नाम थियो । आज डा मागरको मात्र नाम छ । ढोकाभन्दा माथि सानो बोर्डमा भने प्राडा पौडेलको नाम लेखिएको छ ।
यसअघिका कतिपय मेसुले पनि निजी अस्पतालमा काम गर्ने गरेका कारण भरतपुर अस्पताल झन् भद्रगोल बन्दै गएको थियो । अहिले पनि भरतपुर अस्प्तालको अवस्था भद्रगोल छ । बिरामीले सहजरुपमा उपचार पाउने अवस्था छैन । मेसु नै निजीमा जाँदा उनीहरुको स्वार्थ बाझिने र सरकारी अस्पतालको सुधार नहुने सर्वसाधारणले बताउँदै आएका छन् ।
भरतपुर सामुदायिक अस्पतालका व्यवस्थापक रघुनाथ सापकोटाले डाक्टर पौडेलको नाम रहेको बोर्ड हटाएको बारेमा आफूलाई जानकारी नरहेको बताए । उनले भरतपुर सामुदायिक अस्पतालमा प्राडा पौडेलले बिहान ९ बजेसम्म र बेलुका ४ः३० बजेपछिमात्र बिरामी हेर्ने गरेको बताए ।
नाम हटाएर उनले निजीमा काम गर्नै न खोजेका हुन् की नाम नराखी किन भित्रभित्र काम गर्न खोजेका हुन् आगामी दिनमा पक्कै थाहा हुने छ ।
