Breaking News
नारायणगढका अवैध मोबाइल कारोबारमा संलग्नहरु दुई करोड बढी धरौटीमा छुटे
चितवन, भदौ १२ –
चितवनको नारायणगढलाई केन्द्र बनाएर अवैध मोबाइल कारोबार गर्दै आएकाहरु दुई करोडभन्दा बढी धरौटी राखेर छुटेका छन् ।
अवैध कारोबारमा संलग्न भरतपुर महानगरपालिका वडा नम्बर ८ का अर्जुन शर्मा भनिने अर्जुन ढकाल र भरतपुर २१ का ईन्द्रलाल श्रेष्ठ २ करोड २ लाख ९६ हजार रुपैयाँ धरौटी राखेर छुटेका हुन् ।
उनीहरुले नवलपरासीको महेशपुर भन्सार कार्यालयमा धरौटी राखेर छुटेको कार्यालयका भन्सार अधिकृत रामप्रसाद अर्यालले नारायणी अनलाइनलाई जानकारी दिए । उनीहरुबाट बरामद गरिएको मोबाइल भन्सार नियमअनुसार लिलाम गरिने अर्यालले बताए । अवैध मोबाइल कारोबारमा प्रयोग गरिएको प्रदेश ३– ०१– ०२३– च –५५४४ नम्बरको गाडी भन्सार कार्यालयमै राखिएको छ ।
अर्यालका अनुसार सरकारी वकिलको रायका आधारमा भन्सार कार्यालयले धरौटी तोकेको हो । ‘यसको अनुसन्धान कार्यालयले जारी राख्छ । अन्य संलग्न र आवश्यक प्रमाणहरु जुटाएपछि अन्तिम फैसला गरिने छ र थप कारबाही तोकिने छ’ अर्यालले भने । अवैध कारोबारमा संलग्न अन्य मतियाहरु पनि हुन सक्ने भन्दै उनले त्यस विषयमा थप अनुसन्धान गरिने बताए ।
गत महिना नवलपुर हुँदै चितवनको नारायणढतर्फ ल्याउँदै गरेको अवस्थामा इलाका प्रहरी कार्यालय दुम्किवासले ५ सय ९५ थान मोबाइल सहित नारायणगढका ढकाल र श्रेष्ठलाई पक्राउ गरेको थियो । ईलाका प्रहरी कार्यालय दुम्कीबासको टोलिले पक्राउपश्चात मोबाइल र गाडीसहित उनीहरुलाई भन्सार कार्यालयमा बुझाएको थियो ।
ढकाल नारायणगढको ‘ए एण्ड के’ मोबाइलका सञ्चालक हुन् । उनी नारायणगढमै रहेको जनता कृषि सहकारीका उपाध्यक्ष समेत हुन् । उनले सहकारीको दुरुपयोग गरेर अवैध कारोबारमा लाभ लिएको समाचार नारायणी अनलाइनले यसअघि प्रकाशन गरेको थियो । समाचार प्रकाशन भएपछि सहकारीको कारोबारका सम्बन्धमा भरतपुर महानगरपालिकाको सहकारी शाखाले पत्र काटेर स्पष्टिकरण सोधेको छ । पक्राउ परेका श्रेष्ठ शारदानगर जेसीजका वर्तमान अध्यक्ष समेत हुन ।
सम्बन्धित समाचार :
नारायणगढमा अबैध मोवाइल कारोबारीको गिरोह,भन्सार छलेको लाखौंको मोवाइलसहित व्यापारी पक्राउ
नारायणगढको जनता कृषि सहकारीलाई महानगरको सहकारी शाखाले सोध्यो स्पष्टिकरण