आजबाट होली पर्वको रौनक सुरु भएको छ । बिशेष गरि आज पहाडी क्षेत्रमा होलीको रोनक छायाको छ । चैत १५ गते पहाडी जिल्लामा र चैत १६ गते तराईका जिल्ला होली मनाइदैछ । होलीमा बिभिन्न रंगहरुसंग एकआपसमा प्रेम र सदभाव समेत साटासाट गरिन्छ । तर होलीमा खेलिने रंगबारे भने केही सचेत हुन आवश्यक छ ।
होलीमा रासायनिक रंगको उपयोग खतरनाक रहेकाले सकेसम्म प्राकृतिक र हर्बल रंगको प्रयोग गर्नु पर्दछ र प्राकृतिक रंग नपाइएमा वा रसायनयुक्त रंग नै प्रयोग गर्नुपर्ने बाध्यता रहेमा सावधानीका उपायहरू अपनाउनु पर्दछ ।
होलीमा अपनाउनु पर्ने सावधानीहरु
होली खेल्नुअघि शरीरको लगभग सबै भाग छोपिने गरी लुगा लगाए मात्र रंग र अबिरको दुष्प्रभावबाट जोगिन सकिन्छ । साथै टाउकोमा टोपी लगाउँदा रंगको नकारात्मक असर बाट बच्न मद्दत मिल्दछ ।
होली खेल्नुअघि शरीरभरि तेल वा मोइस्चराइजर र फाउन्डेसन लगाउनु राम्रो विकल्प हो । यसो गर्दा रंग छालाभित्र जान पाउँदैन । कपालमा तेल दल्दा र नङ काटेर पालिस लगाउँदा समेत रंगको हानीबाट बच्न सकिन्छ ।
होली खेलिसकेपछि छालामा हुने जलन हटाउन मोइस्चराइजर उपयोग गर्नु पर्दछ । होली खेलेपछि शरीर मज्जाले पखालेर मोइस्चराइजर लगाउँदा छालाको सुक्खापन हट्दछ ।
होली खेलेपछि रंग पखाल्ने नाममा छालालाई बारम्बार साबुन लगाएर रगड्नु हुन्न । यसले छाला सुक्खा हुने र पोल्ने समस्या बढ्न सक्छ । त्यस्तै, नुहाउनुअघि शरीरमा भएको रंग पुछ्नु पर्दछ ।
रंग आखाँमा परे
यदि होली खेल्दा आँखामा रंग परेमा आँखा रातो हुने, पोल्ने, सुन्निने हुन सक्छ । यसले आँखाको कर्निया वा आँखाको सेतो भाग कन्जेक्टाइवालाई नोक्सान पुर्याउँछ । यो सेतो भागमा रंगले गर्दा रातोपना र घाउ हुनसक्छ ।
यस्तोमा तुरुन्त सफा पानीले अर्थात् उमालेर चिसो पारेको खानेपानीले २० देखि ३० मिनेटसम्म आखाँ धोइरहनुपर्छ । तर, आँखा धुँदा जोडले पानी छयाप्नु भने हुदैँन । अन्यथा समस्या झन् बढ्न सक्छ । तर दृष्टि धमिलो भए, आँखा दुखे वा रातो भए तुरुन्त नजिकै अस्पताल जानुपर्छ ।
