काठमाडौं । काठमाडौंको न्यूनतम तापक्रम बिहीबार (आज) ०.८ डिग्रीमा झरेको छ । काठमाडौं उपत्यकाको तापक्रम घटेसँगै आज यस वर्षकै बढी चिसो महसुस गरिएको छ ।
काठमाडौंसहित देशभर चिसो बढेको छ । तराई क्षेत्रमा बाक्लो हुस्सुले जनजीवन प्रभावित बनेको छ ।
जल तथा मौसम विज्ञान विभागका अनुसार बुधबार काठमाडौंको न्यूनतम तापक्रम १.१ डिग्री सेल्सियस थियो । काठमाडौं उपत्यकाको तापक्रम अबका केही दिन निरन्तर घट्ने सम्भावना रहेको मौसमविद् राजु प्रधानाङ्गले बताए ।
‘उपत्यकाको तापक्रम माइनसमा पुग्ने सम्भावना भने कमै छ,’’ मौसमविद् प्रधानाङ्गले भने ।
मौसम पूर्वानुमान महाशाखाको पछिल्लो विवरणअनुसार बिहीबार काठमाडौं उपत्यकाको अधिकतम तापक्रम १६.६ डिग्री सेल्सियस छ ।
त्यस्तै, आज सबैभन्दा कम जुम्लाको न्यूनतम तापक्रम माइनस ८.५ डिग्री र सबैभन्दा धेरै विराटनगरको न्यूनतम तापक्रम ८.२ डिग्री सेल्सियस छ । – रासस
