चितवन राष्ट्रिय निकुञ्जका सैनिकको कुटपिटबाट राजकुमार चेपाङको मृत्यु भएको छ ।
नेपाली सेनाले चितवन राष्ट्रिय निकुञ्जमा सैनिकको कुटाईबाट एक जनाको मृत्यु भएको घटनाका सम्बन्धमा ध्यानाकर्षण भएको जनाउँदै घटनाबारे छानबिन सुरु भइसकेको जानकारी दिएको छ ।
चितवनको राप्ती नगरपालिका २ मिलन टोलका २४ वर्षीय चेपाङको सेनाको कुटपिटबाट बुधबार मृत्यु भएको पीडित परिवारले बताएका छन्।
सेनाले एक विज्ञप्ति जारी गर्दै घटनाबारे आन्तरिक छानबिन सुरु गरिसकेको जानकारी दिएको हो ।
सेनाले अधिकारप्राप्त सरकारी निकायहरुले गरिरहेको विस्तृत छानबिनमा पूर्ण सहयोग गर्ने विज्ञप्तिमार्फत जानकारी दिएको छ ।
‘नेपाली सेना नेपाल सरकारको कार्यादेशअनुसार जिम्मेवारीपूर्ण ढंगले प्रकृति संरक्षण कार्य सम्पादन गर्न प्रतिबद्ध रहेको छ’ सेनाले जारी गरेको विज्ञप्तिमा उल्लेख छ ।
मृतक युवकका बुबा विष्णुलाल चेपाङले घटनाको छानबिन गरी दोषीमाथि कारबाहीको माग गर्दै स्थानीय प्रशासनमा उजुरी गरेका छन् ।
युवकको शव हाल भरतपुरस्थित पुरानो मेडिकल कलेजमा राखिएको छ। दोषीमाथि कारबाही नभएसम्म शव नबुझ्ने अडान आफन्तले लिएका छन्।
