पोखरामा जारी गण्डकी प्रदेशस्तरीय मुख्यमन्त्री कप लिग फुटबल प्रतियोगिताको आजको खेलमा लमजुङको त्रिवेणी युवा क्लब, तनहुँको भीमाद युवा क्लब र नवलपुरको गैँडाकोट खेलकूद विकास समिति विजयी भएका छन् । प्रदेश लिग कमिटीको आयोजनामा पोखरा–२७ भण्डारढीकमा रहेको फुटबल रङ्गशालामा चौथो दिनको पहिलो खेलमा लमजुङको त्रिवेणी क्लबले बौद्ध हिमालय क्लब गोरखालाई ७–१ को फराकिलो अन्तरले पाखा लगाएको छ । त्रिवेणीका नवराज गुरुङ तथा आशिक गुरुङले समान दुई÷दुई तथा उज्वल शाही, हरि गुरुङ र अष्मिन गुरुङले एक÷एक गोल गर्नुभयो । बौद्धका बिनु गुरुङले ५७ औँ मिनेटमा एक गोल फर्काउनुभयो ।
त्यसैगरी भीमादले म्याग्दी जिल्ला खेलकूद विकास समितिलाई २–१ को नतिजामा पराजित गर्दै सेमिफाइनल प्रवेशको सम्भावना बलियो बनाएको छ । भीमादको जीतमा दुवै गोल विनोद घिमिरेले गर्नुभयो । खेलको ४१ औँ र ७४ मिनेटमा उहाँले गोल गर्दै टोलीको जीत सुनिश्चित गर्नुभएको थियो । म्याग्दीका लागि दिवस छन्त्यालले गोल गर्नुभएको थियो ।
तेस्रो तथा अन्तिम खेलमा गँैडाकोटले बागलुङ जिल्ला फुटबल सङ्घलाई ४–१ गोल अन्तरले पराजित गरेको छ । आशिष महतोले पहिलो हाफको ७ र ३१ औँ मिनेटमा गोल गर्दै अग्रता बनाउनुभयो भने प्रविन गुरुङले ७३ औँ मिनेटमा अर्को गोल थप्नुभयो । खेलको १८ औँ मिनेटमा गैँडाकोटले आत्मघाती गोल खाएको थियो । बाग्लुङका लागि प्रमेश थापाले ७६ औँ मिनेटमा सान्त्वना गोल गर्नुभयो ।
प्रतियोगितामा गण्डकी प्रदेशका नौ जिल्लाका लिग च्याम्पियन क्लबको सहभागिता छ । सहभागी क्लबलाई दुई समूहमा विभाजन गरिएको छ । लिग कम नकआउटका आधारमा खेलाइने प्रतियोगितामा समूहका विजेता तथा उपविजेता टोलीले सेमिफाइनलमा स्थान बनाउनेछन् । सेमिफाइनल १३ तथा प्रतियोगिताको फाइनल खेल १४ गते सञ्चालन हुने आयोजकले जनाएका छन् ।
प्रतियोगितामा विजेतालाई रु पाँच लाख तथा उपविजेतालाई रु तीन लाख पुरस्कार प्रदान गरिने अखिल नेपाल फुटबल सङ्घका केन्द्रीय उपाध्यक्ष कृष्ण थापाले जानकारी दिनुभयो ।
